Harry Potter o‘yini remeyki Unreal Engine 5’da yaratilmoqda
MattShadd taxallusi bilan tanilgan mustaqil dasturchi 2001-yilda kompyuter uchun yaratilgan *Harry Potter and the Philosopher’s Stone* o‘yinining remeyk versiyasi ustida ish olib bormoqda. Bu haqda Zamin.uz xabar berdi.
Ushbu loyiha HP1R nomi bilan tanilgan bo‘lib, u Unreal Engine 5 texnologiyasi asosida qayta yaratilmoqda. Dasturchi bu ishni oddiy grafikani yaxshilash emas, balki o‘yinni to‘liq qayta yaratish deb ta’riflamoqda.
Bu haqda playground.ru sayti xabar berdi. Muallifning asosiy maqsadi – original o‘yin muhitini saqlab qolgan holda zamonaviy texnologiyalarni qo‘llash.
Loyihada mato va soch fizikasi, silliq animatsiyalar hamda ilg‘or grafik effektlar qo‘shilgan. Hozirga qadar o‘yinning eski darajalari yangi muhitga moslashtirilgan, dialoglarning ovozli yozuvlari integratsiya qilingan, shuningdek, parkur tizimi va jangovar mexanika ishlab chiqilmoqda.
Sehr-jodular uchun yangi vizual effektlar, jumladan, iz qoldiruvchi va portlashli partikl effektlar yaratilgan. Qahramonlarning harakatlari va NPClar (o‘yin qahramonlari bo‘lmagan personajlar) uchun tinim animatsiyalari qo‘shilgan.
Sehr o‘rganish mini-o‘yini ham qayta tiklangan. O‘yinchi belgilangan vaqt ichida kursorni shakl bo‘ylab harakatlantirishi kerak bo‘ladi.
Loyihaning texnik jihatlarida ham katta o‘zgarishlar qilingan. Masalan, Xogvarts devorlaridagi portretlar harakatlanuvchi animatsiyaga ega.
Saqlash tizimi ishlab chiqilib, o‘yin darajalari o‘rtasida obyektlarning holati eslab qolinadi. Katssena va dialoglar uchun maxsus tizim yaratilgan bo‘lib, dialoglarni o‘tkazib yuborish imkoniyati ham mavjud.
Dushmanlar uchun sun’iy intellekt tizimi ishlab chiqilgan. Pixilar uchun uchish mexanikasi qayta yozilgan, gnomlar bilan to‘qnashuvlar esa alohida ishlab chiqilgan.
O‘yinda bosh menyu, grafik sozlamalar va saqlangan fayllarni yuklash funksiyalari allaqachon faol. Dasturchi loyiha mualliflik huquqlarini buzishi mumkinligini tan oladi va bu ish faqat ko‘ngilochar hamda o‘quv maqsadlarida amalga oshirilayotganini ta’kidlaydi.
Shu bilan birga, huquq egalaridan kelishi mumkin bo‘lgan bloklash xavfini ham inobatga olmoqda.
