Ozodbek Nazarbekov to‘yda pul olishiga izoh berildi
Ijtimoiy tarmoqlarda Madaniyat vaziri Ozodbek Nazarbekovning to‘y marosimida qo‘shiq kuylab, unga uzatilgan pullarni qabul qilayotgani aks etgan video keng muhokamalarga sabab bo‘ldi. Bu haqda Zamin.uz xabar berdi.
Ushbu holat yuzasidan Madaniyat vazirligi rasmiy izoh berdi. Vazirlikning ma’lum qilishicha, video 2025 yil 25 oktyabr kuni vazirlik xodimlaridan birining nikoh to‘yida tasvirga olingan.
Unda vazirga muxlislar tomonidan pul uzatilgani qayd etilgan. Rasmiy bayonotda bu holat oldindan rejalashtirilmagani ta’kidlangan.
Vazirga uzatilgan pullarni qabul qilmaslik to‘y ishtirokchilari tomonidan kamsitish yoki mensimaslik sifatida qabul qilinishi mumkinligi inobatga olingan. Shu sababli, yuzaga kelgan vaziyatga ijobiy munosabat bildirilgani aytilgan.
Vazirlikning qayd etishicha, to‘y marosimlarida xonandalarga pul qistirish amaldagi qonunchilikka zid emas. Bu qadimdan xalqimiz orasida mavjud bo‘lgan milliy urf-odat va qadriyatlarning bir qismi sifatida qabul qilinadi.
Bunday holatlar o‘zbek an’analarida “orzu-havas” deb ataladi. Shuningdek, rasmiylar Ozodbek Nazarbekov nafaqat davlat arbobi, balki taniqli san’atkor ekanini eslatib o‘tishgan.
U O‘zbekiston, Qoraqalpog‘iston, Tojikiston va Qirg‘iziston xalq artisti unvonlariga ega bo‘lib, xizmat ko‘rsatgan madaniyat xodimi hisoblanadi. To‘yda kuzatilgan holat ham uning xonandalik faoliyati bilan bog‘liq ekanini inobatga olish kerakligi ta’kidlangan.
Bayonotda: “Har qanday inson, egallab turgan lavozimidan qat’i nazar, o‘z kasbidan ajralib qolmaydi. Bu holat ham shu nuqtai nazardan kelib chiqqan”, – deyiladi.
Shu bilan birga, Korrupsiyaga qarshi kurashish agentligi mazkur holat yuzasidan Madaniyat vazirligiga taqdimnoma kiritgani haqida xabar berilgan. Eslatib o‘tamiz, bu Ozodbek Nazarbekov bilan bog‘liq ilk muhokamali holat emas.
2024 yilda u Kingsman kiyim do‘koni reklamasida ishtirok etgan, 2025 yilda esa xususiy universitet reklama roligida ko‘ringan edi. O‘shanda ham vazirlik bu harakatlarda moddiy manfaatdorlik bo‘lmaganini ma’lum qilgan edi.
