Blackpink yangi mini-albomi taqdimot sanasini e’lon qildi
K-pop dunyosining eng mashhur guruhlaridan biri bo‘lgan Blackpink muxlislarini yangi xushxabar bilan quvontirdi. Bu haqda Zamin.uz xabar berdi.
YG Entertainment tomonidan berilgan rasmiy ma’lumotga ko‘ra, joriy yilning 27-fevral kuni guruhning “Deadline” nomli yangi mini-albomi taqdim etiladi. Ma’lum qilinishicha, “Deadline” Blackpink guruhining uchinchi mini-albomi bo‘lib, bungacha ular 2018 yilda “Square Up” va 2019 yilda “Kill This Love” mini-albomlarini chiqargan edi.
Guruhning so‘nggi to‘liq albomi — “Born Pink” 2022 yilda taqdim etilgan bo‘lib, u xalqaro musiqiy chartlarda yuqori o‘rinlarni egallagan. Yangi mini-albom nomi guruhning hozirgi jahon gastrol safari bilan bog‘liq bo‘lib, mazkur musiqiy loyiha gastrol konsepsiyasiga mos ravishda taqdim etilishi rejalashtirilgan.
Albomning e’lon qilinishi ijtimoiy tarmoqlarda qisqa video orqali amalga oshirildi, biroq undagi treklar ro‘yxati hozircha oshkor qilingan emas. Muxlislar Blackpink’ning yangi loyihasi va undagi musiqiy yo‘nalishni katta qiziqish bilan kutmoqda.
