“Melaniya” filmi kinoteatrlarda namoyish etila boshlandi

AQShning sobiq birinchi xonimi Melaniya Tramp haqida suratga olingan “Melaniya” nomli hujjatli film kinoteatrlarda namoyish etila boshlandi. Bu haqda Zamin.uz xabar berdi.

Ushbu filmning davomiyligi 104 daqiqani tashkil etadi. Unda Donald Trampning 2025-yilgi ikkinchi inauguratsiyasi oldidan o‘tgan 20 kunlik davr yoritilgan.

Biroq, kino bozorida ushbu loyiha atrofida kayfiyat unchalik iliq emas. Tanqidchilar va tahlilchilar filmning katta mablag‘ sarflanganiga qaramay, prokatda muvaffaqiyatli bo‘lishiga shubha bildirishmoqda.

Filmning reklama va marketing ishlari uchun taxminan 35 million dollar ajratilgani aytiladi. Ba’zi manbalarda esa umumiy xarajatlar 75 million dollarga yetgani haqida ma’lumotlar mavjud.

Filmni Donald Trampning o‘zi ham faol targ‘ib qilgan. U o‘zining Truth Social tarmog‘ida filmni albatta ko‘rishni tavsiya qilgan.

Shuningdek, 30-yanvarda uni ikkinchi marta tomosha qilgani va filmni yoqtirganini yozib qoldirgan. Shu sababli, filmning ommaviy qiziqish uyg‘otishi bo‘yicha turli fikr-mulohazalar mavjud.