Tarkan 7 yillik tanaffusdan so‘ng sahnaga qaytdi
Turkiya estradasining mashhur xonandasi Tarkan uzoq tanaffusdan so‘ng katta sahnaga qaytdi. Bu haqda Zamin.uz xabar berdi.
Xonanda 7 yillik tanaffusdan keyin Istanbuldagi “Volkswagen Arena”da katta konsert dasturini taqdim etdi. Ushbu konsertda 5 mingdan ortiq muxlis ishtirok etib, unutilmas kechadan bahramand bo‘ldi.
Tarkanning 8 kunlik konsert dasturi uchun sotuvga chiqarilgan barcha chiptalar qisqa vaqt ichida tugab ketdi. Bu holat ko‘plab ashaddiy muxlislarning konsertga kira olmasligiga sabab bo‘ldi.
Ammo xonanda san’atkorlik faoliyatidagi samimiyligi va muxlislariga bo‘lgan hurmatini yana bir bor ko‘rsatdi. Ijtimoiy tarmoqlarda tarqalgan videolarda Tarkan chiptasiz qolgan sodiq muxlislaridan biriga o‘z qo‘li bilan chipta sovg‘a qilgani aks etgan.
Bu hodisa uning muxlislar qalbida yanada chuqurroq o‘ringa ega bo‘lishiga va unga bo‘lgan mehrning oshishiga sabab bo‘ldi. Tarkan bu kabi insoniyligi bilan nafaqat san’atda, balki insoniy qadriyatlarda ham o‘zining yuksak o‘rnini yana bir bor namoyish etdi.
