“Kinder” bolasi kimligi 20 yildan so‘ng ma’lum bo‘ldi

O‘n besh yil davomida “Kinder” shokoladining o‘ramidagi tabassumli bola chehrasi barchaga tanish edi. Bu haqda Zamin.uz xabar berdi.

Ammo bu bolaning shaxsi uzoq vaqt sir saqlandi. Shu sabab turli taxminlar, mish-mishlar va hatto o‘zini “o‘sha bola” deb ko‘rsatishga uringan odamlar ham paydo bo‘ldi.

Aslida esa haqiqiy qahramon shartnoma shartlari tufayli sukut saqlashi lozim edi. Barchasi 2004 yilda boshlangan.

O‘sha yili kompaniya 11 yoshli italiyalik Matteo Farnetini tanladi. Dizaynerlar uning suratini qayta ishlab, brendning ramziga aylantirdi.

Qadoq dizayni bir necha bor yangilandi, fon va kiyimlar o‘zgardi, biroq bolaning tabassumi va umumiy obrazi o‘zgarishsiz qoldi. Yillar davomida turli odamlar o‘zini “Kinder” o‘ramidagi bola deb da’vo qildi.

Masalan, Buyuk Britaniyalik Josh Beytson bu obrazni modellik faoliyatida ishlatgan, Italiyada esa teleboshlovchi Alessandro Egger shunday gaplarni aytgan. Shu bilan birga, kompaniya bu masalaga izoh bermagan, Matteo esa onasi imzolagan shartnoma sabab sukut saqlagan.

Shartnoma muddati 2019 yilda yakunlandi. 2021 yilda Matteo ehtiyotkorlik bilan o‘sha bola ekanini ma’lum qildi, ammo bu bayonot yana bahslarga sabab bo‘ldi.

Nihoyat, 2024 yilda u “Ferrero” bilan imzolangan hujjatlarni taqdim etib, 2004–2019 yillarda qadoqda uning surati ishlatilganini rasman tasdiqladi. Shuningdek, u ramziy marosimda o‘z “rol”ini yangi bolaga topshirdi, biroq yangi qahramonning ismi ochiqlanmagan.

Hozirda Matteo Farneti 32 yoshda. U model va aktyor sifatida faoliyat yuritadi, turli reklama kampaniyalarida ishtirok etadi va ko‘p sayohat qiladi.

Ijtimoiy tarmoqlarda ish jarayonlari, sayohatlar va do‘stlari bilan suratlarini ulashadi. U shaxsiy hayoti haqida kam gapiradi, lekin ba’zi postlarida o‘qishi haqida ma’lumotlar uchraydi.

Matteo “Kinder” bilan ishlashni o‘z hayotidagi muhim imkoniyat sifatida baholaydi va o‘sha yillarni tabassum bilan eslaydi.