Manzura 20 yosh kichik yigitga turmushga chiqmoqda
Xonanda Manzura turmushga chiqayotgani haqidagi xabarlar ijtimoiy tarmoqlarda katta e’tibor qozondi. Bu haqda Zamin.uz xabar berdi.
U bu masalada “Yashin TV”ga intervyu berib, o‘zining shaxsiy hayotiga oid ayrim savollarga ochiq javob berdi. Manzura bu voqeani ataylab tarqatilgan reklama emasligini ta’kidladi.
Uning so‘zlariga ko‘ra, turli mish-mishlar, jumladan, “turmushga chiqqan” yoki “ajrashgan” kabi gap-so‘zlar tarqalganidan so‘ng, muxlislarga haqiqatni o‘zi ma’lum qilishni lozim topgan. Manzura bo‘lajak turmush o‘rtog‘i bilan Chimkentda tanishganini aytdi.
U Chimkentga taniqli san’atkor Adhambek Yo‘ldoshev bilan duet tayyorlash maqsadida borgan va aynan shu safar davomida kelajakdagi jufti bilan uchrashgan. Eng ko‘p muhokama qilingan masala — yosh farqi edi.
Manzura bo‘lajak turmush o‘rtog‘i undan 20 yosh kichik ekanini ochiq tan oldi. Avvaliga bunday qarorga kelish oson bo‘lmaganini, ammo yigitning fikrlashi va munosabati yoshiga nisbatan ancha yetuk ekanini tushunib, qarorini qat’iy qilganini bildirdi.
Xonandaning so‘zlariga ko‘ra, bo‘lajak juftining ayollarga hurmat bilan muomala qilishi va oila a’zolariga mehribonligi uning tanloviga kuchli ta’sir ko‘rsatgan. Shuningdek, u o‘zaro uyg‘unlik va avlodlararo moslik borligini ham alohida qayd etdi.
Manzuraning so‘zlariga qaraganda, nikohdan so‘ng u Chimkentga ko‘chib o‘tadi, lekin ijodini davom ettiradi. Bo‘lajak turmush o‘rtog‘i uning kasbiy faoliyatiga to‘sqinlik qilmasligini aytgan va Manzurani “borligingcha qabul qilaman” degan so‘zlar bilan qo‘llab-quvvatlagan.
Ijtimoiy tarmoqlarda tarqalgan “alfons” degan gaplarga javoban Manzura bo‘lajak jufti o‘z oilasini boqishga qodir, ish-hunari bor inson ekanini ta’kidladi. Suhbat so‘ngida u haqiqiy baxt oila ekanini, yaxshi xulqli juft esa inson uchun eng katta boylik ekanini alohida ta’kidladi.
