Munisa Rizayeva “Arzimaysan” qo‘shig‘ini taqdim etdi
Mashhur xonanda Munisa Rizayeva 5-fevral kuni yangi qo‘shig‘i — “Arzimaysan” taronasini ommaga taqdim etdi. Bu haqda Zamin.uz xabar berdi.
Uzoq yillar davomida bunday mavzulardan chetda bo‘lgan san’atkor bu safar yurak og‘rig‘i, qadrsizlik va befarqlik haqida kuylashga qaror qildi. Yangi qo‘shiq ilk ondayoq ko‘plab tinglovchilar qalbiga yetib bordi va iliq fikrlar bildirilishiga sabab bo‘ldi.
Munisa Rizayeva o‘zining ijtimoiy tarmoq sahifasida tarona haqida fikr bildirar ekan, atrofimizdagi ayrim insonlar va ularning munosabati haqida to‘xtalib o‘tdi. U bunday dedi: “Ko‘p hollarda biz keraksiz narsalar va insonlarga haddan tashqari e’tibor qaratamiz.
Aslida esa ular hatto bir daqiqamizga ham arzimaydi.” Xonanda bu taronani qadrsiz mehr va e’tiborga qarshi javob sifatida yaratganini ta’kidladi. “Arzimaysan” qo‘shig‘i san’atkorning ichki kechinmalaridan ilhomlangan bo‘lib, tinglovchilar uni samimiy va yurakdan chiqqan asar sifatida baholashdi.
Ijtimoiy tarmoqlarda bu haqda “Bu oddiy qo‘shiq emas, yurakdan chiqqan dard” kabi fikrlar qoldirildi. Premyera YouTube hamda boshqa musiqa platformalarida joylashtirildi va qisqa vaqt ichida katta qiziqish uyg‘otdi.
