“Formula 1” filmining ikkinchi qismi suratga olinadi
“Formula 1” filmi muxlislari uchun yaxshi yangilik bor — mazkur filmning ikkinchi qismi suratga olinishi rejalashtirilmoqda. Bu haqda Zamin.uz xabar berdi.
Bu haqda prodyuser Jerri Brukxaymer “BBC”ga bergan intervyusida ma’lum qilgan. Prodyuserning so‘zlariga ko‘ra, loyiha ustida ishlar olib borilmoqda, ammo hozircha uning aniq muddati yoki aktyorlar tarkibi haqida ma’lumot berilmagan.
Shuningdek, filmning birinchi qismida bosh qahramonni o‘ynagan Bred Pittning yangi qismda ishtirok etishi ham noma’lumligicha qolmoqda. Brukxaymer: “Biz filmni davom ettirish ustida ishlayapmiz”, — deb ta’kidladi.
Filmning davomi haqidagi dastlabki mish-mishlar 2025 yil kuzida paydo bo‘lgan edi. Rejissyor Jozef Kosinski ham ushbu loyihani davom ettirish istagini bildirgan.
O‘tgan noyabr oyida u ijodiy jamoaning izlanish bosqichida ekanini ma’lum qilgan edi. Eslatib o‘tamiz, “Formula 1” filmi Apple TV platformasida katta muvaffaqiyat qozongan va daromad bo‘yicha Ridli Skottning “Napoleon” hamda Martin Skorsezening “Killers of the Flower Moon” filmlaridan o‘zib ketgan edi.
Film syujetiga ko‘ra, bosh qahramon Sonni Xeys (Bred Pitt) sobiq “Formula 1” poygachisi bo‘lib, og‘ir avariyadan so‘ng sportdan ketadi. Oradan yillar o‘tib, yosh va iste’dodli poygachi Joshua Pirsga (Damson Idris) murabbiylik qilish uchun yana trekka qaytadi.
Mazkur qiziqarli hikoya davom ettirilishi kutilmoqda.
