Lola Eltoyeva xalqaro teatr mukofotiga sazovor bo‘ldi
Istanbul shahrida TURKSOY xalqaro teatr mukofotlarini topshirish bo‘yicha tantanali marosim bo‘lib o‘tdi. Bu haqda Zamin.uz xabar berdi.
Ushbu nufuzli tadbir o‘n birinchi bor tashkil etilib, turkiy davlatlarning teatr sohasida faoliyat yuritayotgan yetakchi ijodkorlari 2025 yil yakunlari bo‘yicha turli nominatsiyalar bilan taqdirlandi. Quvonarlisi, ushbu tadbirda O‘zbekiston Milliy akademik drama teatri aktrisasi, O‘zbekistonda xizmat ko‘rsatgan artist Lola Eltoyeva “Eng yaxshi teatr aktrisasi” nominatsiyasida g‘olib deb topildi va xalqaro mukofotga sazovor bo‘ldi.
Bu yutuq nafaqat aktrisa uchun, balki butun o‘zbek teatr san’ati uchun katta sharaf bo‘ldi. Mazkur marosim har yili Xalqaro Anadolu teatr mukofotlari doirasida tashkil etiladi.
Uning asosiy maqsadi turkiy davlatlar teatr jamoalari o‘rtasidagi ijodiy hamkorlikni kuchaytirish, umumiy madaniy merosni rivojlantirish va sahna san’atini yanada yuksaltirishdan iboratdir. Shuningdek, boshqa davlat vakillari ham turli yo‘nalishlarda mukofot bilan e’tirof etildi.
Jumladan, Qozog‘istondan Erenbak Toykenov “Eng yaxshi teatr rejissyori”, Qirg‘izistondan Sadir Niyazaqunov “Eng yaxshi sahna rassomi”, Ozarbayjondan Ali Emirli “Eng yaxshi dramaturg” va Turkmanistondan Batir Chariyev “Eng yaxshi teatr aktyori” nominatsiyalarida g‘oliblikni qo‘lga kiritdi. Ushbu xalqaro tadbir turkiy xalqlar o‘rtasidagi madaniy aloqalarni mustahkamlash va teatr san’atining rivojlanishiga xizmat qiladigan muhim voqealardan biri sifatida ahamiyat kasb etadi.
