Britni Spirs musiqiy katalogini 200 mln dollarga sotdi
Amerikalik mashhur pop qo‘shiqchi Britni Spirs o‘zining eng taniqli qo‘shiqlari, jumladan “Baby One More Time” va “Toxic” kabi xitlar kiradigan musiqiy katalogiga bo‘lgan huquqlarni sotdi. Bu haqda Zamin.uz xabar berdi.
NBC xabariga ko‘ra, mazkur kelishuv 2025 yil 30 dekabr kuni Primary Wave kompaniyasi bilan imzolangan bo‘lib, uning qiymati taxminan 200 million dollarni tashkil qilgan. Primary Wave musiqiy industriyada taniqli san’atkorlarning merosiga egalik qiluvchi yirik kompaniyalardan biri hisoblanadi.
U ilgari Bob Marli, Prins, Uitni Xyuston, Stivi Niks, Aerosmith va The Doors kabi mashhur san’atkorlarning musiqiy kataloglarini ham sotib olgan. So‘nggi yillarda ko‘plab taniqli musiqachilar o‘z musiqiy asarlarini katta summalarga sotishni boshlashdi.
Masalan, Sting, Bob Dilan, Pink Floyd va Queen guruhlari shunday kelishuvlardan yirik moliyaviy foyda ko‘rishgan. Xususan, Queen guruhining katalogi Sony kompaniyasiga 1,27 milliard dollar evaziga sotilgan edi.
Britni Spirsning ushbu qarori uning kelajakdagi san’atkorlik faoliyatiga qanday ta’sir qilishi hozircha noma’lum. Ammo bu qaror, shubhasiz, uning moliyaviy mustaqilligini mustahkamlashga xizmat qiluvchi muhim qadam bo‘ldi.
