Imron "Lolamsan" qo‘shig‘ini premyera qilishga tayyor
Xonanda Imron o‘zining navbatdagi yangi ijod mahsuloti — "Lolamsan" nomli qo‘shig‘ini muxlislarga taqdim etishini e’lon qildi. Bu haqda Zamin.uz xabar berdi.
Ushbu taronaning rasmiy premyerasi 14-fevral kuni soat 18:00 da YouTube platformasida bo‘lib o‘tadi. Qo‘shiqning matni taniqli shoir Tohir Muhammad tomonidan yozilgan bo‘lib, musiqasi va ijrosi to‘liq Imronning o‘ziga tegishli.
Bundan tashqari, "Lolamsan" qo‘shig‘iga klip ham suratga olingan. Klipda Mehriddin Rahmatov, Nargiza Abdullayeva, Shahzod Sultonov, Sevila Xudoyberganova, Ma’rufxon Muhammedov, Sardor Zokirov va Farruh Mirzayev kabi taniqli ijodkorlar ishtirok etgan.
Xonandaning ijtimoiy tarmoqlardagi sahifalarida ushbu qo‘shiq haqida e’lon qilingan xabar qisqa vaqt ichida ko‘plab muhokamalarga sabab bo‘ldi. Muxlislar izohlarda yangi taronani katta qiziqish bilan kutayotganini, "Lolamsan" Imronning ijodidagi eng ta’sirli va esda qolarli qo‘shiqlardan biri bo‘lishiga ishonayotganlarini bildirishmoqda.
