Juhayna Lango: O‘zbek kinosiga bo‘lgan orzu va qat’iyat
Afro-o‘zbek model Juhayna Lango yaqinda “Omon-omon” dasturida mehmon bo‘lib, hayoti, oilasi va orzulari haqida ochiq gapirdi. Bu haqda Zamin.uz xabar berdi.
U o‘zining bolaligi, ota-onasi hayotidagi qiziqarli voqealar va o‘zbek kinosiga bo‘lgan qiziqishi haqida so‘zlab berdi. Juhaynaga ko‘ra, u Ummonda tug‘ilgan bo‘lsa-da, arab millatiga mansub emas.
Uning ismi arabcha bo‘lsa-da, otasi nigeriyalik, onasi esa buxorolik o‘zbek-tatar millatidan. “Ismimni hech qachon o‘zgartirib aytmayman, faqatgina buvim Juju deb chaqiradi”, — deydi u.
Modelning aytishicha, uning otasi legioner sifatida Toshkentga kelgan va onasini sevib qolgan. Ularning muhabbati qarindosh-urug‘larning qarshiligiga qaramasdan davom etgan.
Hozirda Juhayna otasi bilan deyarli aloqada emas. “Telefonda gaplashganman, lekin uni hayotda ko‘rmaganman”, — deydi u.
Juhayna Navoiyda ulg‘aygan, yozgi ta’tillarini esa Buxoroda o‘tkazgan. Rus maktabida tahsil olgan bo‘lsa-da, o‘zbek tilidan “besh” baho olganini faxr bilan aytadi.
U o‘zbek, rus, ingliz, turk tillarida erkin so‘zlasha oladi, shuningdek, biroz tojik tilini ham biladi. Model milliy kiyimlarga bo‘lgan munosabatini ham ochiq aytib berdi.
“Bolaligimdan qorachaman. Milliy kiyim kiysam, ba’zilar meni noto‘g‘ri tushunib, lo‘li deb o‘ylashadi”, — deydi u.
Shu sababdan u milliy liboslarni kam kiyishini tan oldi. Juhaynaning yana bir katta orzusi — o‘zbek filmlarida rol ijro etish.
U Samarqanddagi Chet tillar universitetiga o‘qishga kirgan, ammo karantin davrida ishlashga majbur bo‘lib, o‘qishni vaqtincha to‘xtatgan. Shunga qaramay, “Bir kuni albatta diplom olaman”, deydi u qat’iyat bilan.
Unga “Afrikalik kelin” loyihasida ishtirok etish taklif qilingan, biroq vaqt masalasi to‘g‘ri kelmagan. Juhayna o‘z hayoti va faoliyati bilan ko‘pchilikni qiziqtirayotgan, o‘ziga xos shaxs sifatida e’tibor qozonmoqda.
