Hilola va Getundan "Ko‘zlaringga" dueti taqdim etildi
Xonanda Hilola G‘ayratova va reper Getunda "Ko‘zlaringga" nomli yangi duetini tinglovchilarga taqdim etdi. Bu haqda Zamin.uz xabar berdi.
Ushbu qo‘shiq premyerasi haqida xabar ijtimoiy tarmoqlarda keng tarqalib, tinglovchilar orasida qizg‘in muhokamalarga sabab bo‘ldi. Hilola G‘ayratova so‘nggi paytlarda duet loyihalarini ko‘paytirayotganini o‘zining ijtimoiy tarmoqlardagi sahifalarida tez-tez e’lon qilib kelmoqda.
Avvalroq u San Jay bilan "Seni o‘ylasam" nomli duetini chiqargan edi. Oradan ko‘p o‘tmay, u yana yangi qo‘shiq bilan muxlislarni xushnud etdi.
Hilola san’at ixlosmandlariga asosan The Cover Up loyihasidagi chiqishlari orqali tanilgan. Uning mayin va yoqimli ijrodagi koverlari qisqa vaqt ichida katta auditoriya e’tiborini tortgan edi.
Yangi duet – "Ko‘zlaringga" trekida Hilolaning partiyasi nisbatan qisqaroq bo‘lsa-da, musiqaning matni va ohangi bir-biriga uyg‘un bo‘lib, tinglovchiga yoqimli tuyg‘ularni hadya etadi. Qo‘shiqda zamonaviy uslubdagi ritmlar va ohanglar sezilib, ayrim tinglovchilar bu asarda xorijiy musiqiy ijodkorlar, jumladan, XXXTentacion uslubidan ilhom borligini ta’kidlashmoqda.
