Yildiz Tilbe Ramazonda 12 ming kishiga iftor berdi
Turkiyalik mashhur xonanda Yildiz Tilbe Ramazon oyida muhtojlarga yordam ko‘rsatish maqsadida yirik xayriya faoliyatini yo‘lga qo‘ydi. Bu haqda Zamin.uz xabar berdi.
U har kuni G‘azoda qurolli to‘qnashuvlar va og‘ir sharoitlar tufayli ochlikdan aziyat chekayotgan 12 ming kishiga iftor dasturxonini tashkil qilmoqda. Ushbu dasturxonlar issiq taomlardan iborat bo‘lib, ular nodavlat tashkilotlar yordamida muhtojlarga yetkazib berilmoqda.
Xonanda bu ishni faqat G‘azo bilan cheklamay, yordamni yanada kengroq hududlarga yoyishni maqsad qilgan. Uning “Har bir uyda issiq ovqat bo‘lishi kerak!” degan shiori ostida Yaman, Suriya, Afg‘oniston, Sharqiy Turkiston, Efiopiya, Janubiy Sudan, Arakan va Kashmir kabi mintaqalardagi muhtojlarga ham yordam ko‘rsatish rejalashtirilgan.
Tilbening xayriya tadbirlari Quddus ko‘ngillilari uyushmasi tomonidan tashkil etilib, uning nomidan amalga oshirilmoqda. Bu ishlar yordamga muhtoj insonlarga Ramazon oyida katta quvonch ulashmoqda.
