Manorama hind kino tarixida unutilmas qattiqqo‘l qaynona rolida
Hind kinosi tarixida ekran yuzida qisqa lahzalar ko‘rinib, tomoshabin qalbida chuqur iz qoldirgan aktrisalar bor. Bu haqda Zamin.uz xabar berdi.
Shunday iste’dod egalari orasida “Zita va Gita” filmidagi qattiqqo‘l qaynona rolini ijro etgan Manorama alohida o‘rin tutadi. Manoramaning asl ismi Erin Isaak Daniyel bo‘lib, u 1926 yil 16 avgustda Lahorda tug‘ilgan.
Uning otasi irlandiyalik, onasi esa hindistonlik edi. Bolalik davri qiyinchiliklar bilan kechdi, moddiy muammolar va hayotiy sinovlar uni erta voyaga yetkazdi.
Yoshligidan san’atga, xususan sahnaga qiziqish bildirgan Manorama bu ishtiyoqini kino sohasida davom ettirdi. Bollivudda o‘z o‘rnini topish oson bo‘lmaganiga qaramay, u tinimsiz mehnat va o‘ziga xos iste’dod yordamida mashhurlikka erishdi.
U klassik davr Bollivudining eng taniqli ikkinchi plandagi aktrisalaridan biri bo‘ldi. Manoramaning ijro etgan rollari juda jonli va ta’sirli edi.
U qattiqqo‘l, ayyor, ba’zan kulgili, ba’zan esa dahshatli ayol obrazlarini mahorat bilan gavdalantirardi. Uning mimikasi, ovozi va harakatlari tomoshabinning xotirasida uzoq saqlanardi.
1972 yilda chiqarilgan “Zita va Gita” filmi orqali Manorama keng shuhrat qozondi. Unda u zolim va shafqatsiz qaynona Kaushaliya rolini ajoyib ijro etdi.
Bu obraz tomoshabinlarni hayratda qoldirdi va kino tarixida muhim o‘rin oldi. Manorama ushbu roli bilan “salbiy komediya ustasi” sifatida tanildi.
Ekranda qattiqqo‘l va qo‘rqinchli ko‘rinishga ega bo‘lgan Manoramani hayoti esa murakkab kechdi. U turmush qurgan bo‘lsa-da, oilaviy baxtni to‘liq his qila olmadi.
Erining vafotidan so‘ng u katta ruhiy zarba oldi. Eng og‘ir dardi esa qizining bedarak yo‘qolishi edi.
Rita Axtar uning yaqin insoni bo‘lib, sirli tarzda yo‘qoldi. Manorama yillar davomida farzandini izlab, umid qilgan, ammo bu orzu amalga oshmadi.
Qizidan ayriliq og‘rig‘i uning qalbida umrining oxirigacha saqlanib qoldi. Yosh o‘tishi bilan Manoramaga kino sohasidan takliflar kamaydi, daromadi pasaydi.
Bir paytlar millionlab muxlislar mehriga sazovor bo‘lgan aktrisa moliyaviy qiyinchiliklarga duch keldi, hatto uydan ham ayrildi. Ba’zi ma’lumotlarga ko‘ra, u vaqtincha ko‘chada yashashga majbur bo‘lgan.
Bu holat uning shonli o‘tmishi bilan mutlaqo mos kelmas edi. Hayotining so‘nggi yillarida Manorama bir necha loyihalarda ishtirok etib, moliyaviy jihatdan biroz barqarorlikka erishdi.
U kichik uy sotib olib, tinch va osoyishta hayot kechirishga harakat qildi. Manorama 81 yoshida insultdan vafot etdi.
Afsuski, uning dafn marosimida juda kam odam qatnashdi. Shu tariqa, mashhur aktrisa deyarli unutilgan holda hayotdan ko‘z yumdi.
