Ozbékiston xizmat ko rsatgan artist Dono Boboxonova vafot etdilar
O'zbekiston san'ati uchun katta yo'qotish yuz berdi. Bu haqda Zamin.uz xabar berdi.
Mamlakatimizning taniqli ijodkorlaridan biri, O'zbekistonda xizmat ko'rsatgan artist Dono Boboxonova 80 yoshda vafot etdilar. Mazkur achchiq xabar haqida O'zbekiston davlat drama teatri rasmiy ravishda ma'lum qildi.
Dono Boboxonova 1946 yil 20 noyabrda dunyoga kelganlar. U kishi o'zining oliy ma'lumotini Toshkent teatr va rassomlik institutida olib, professional ijodiy faoliyatini Yosh gvardiyachilar teatri sahnasida boshlaganlar.
Keyinchalik ushbu teatr Abror Hidoyatov nomidagi O'zbek davlat drama teatri deb nomlandi va artist o'zining asosiy ijodiy yo'lini aynan shu sahna bilan bog'ladilar. Ko'p yillik samarali mehnati, san'atni rivojlantirishga qo'shgan ulkan hissasi va mahorati uchun Dono Boboxonova 1996 yilda O'zbekiston Respublikasida xizmat ko'rsatgan artist faxriy unvoniga sazovor bo'lganlar.
U kishi nafaqat teatr sahnasidagi rollari, balki kino olamidagi obrazlari bilan ham keng omma orasida tanilgan va hurmat qozonganlar. Aktrisaning ijodiy faoliyatida ko'plab yorqin ishlar mavjud.
Xususan, Bozor ko'rmagan yigit, Arazlasang, o'laman, Chol va nabira hamda Tilim qursin kabi filmlardagi mahoratli rollari bilan tomoshabinlar qalbidan chuqur joy oldilar. Uning har bir obrazi o'ziga xoslikka ega bo'lib, milliy san'atimizning boyligini oshirishga xizmat qildi.
Dono Boboxonovaning vafoti butun san'at olami uchun og'ir yo'qotishdir. U kishining ijodi, kasbiga bo'lgan sadoqati va qoldirgan ma'naviy merosi kelgusi avlod aktyorlar uchun namuna bo'lib xizmat qiladi.
Muxlislar va hamkasblar xotirasida u kishi doimo o'zining samimiyati va mahorati bilan yashaydi.
