Gaybulla Tursunov sodiq muxlisining uzoq yillik orzusini amalga oshirdi
Mashhur xonanda G‘aybulla Tursunov o‘zining eng sodiq muxlislaridan biri bo‘lgan Buxoro viloyatlik Dildora opa bilan uchrashib, uning uzoq yillik orzusini amalga oshirdi. Bu haqda Zamin.uz xabar berdi.
San’atkor ushbu uchrashuv haqidagi videoni ijtimoiy tarmoqlarda e’lon qilib, bu kunning o‘zi uchun ham alohida ahamiyatga ega ekanligini ta’kidladi. Xonandaning so‘zlariga ko‘ra, Dildora opa ko‘p yillardan buyon uning ijodini chin dildan qo‘llab-quvvatlab kelgan.
Muxlisa san’atkorning qaysi viloyatda konsertlari bo‘lishidan qat’i nazar, imkon qadar barcha tadbirlarda ishtirok etib, o‘z qo‘llab-quvvatlovini bildirgan. U nafaqat sodiq muxlis, balki xonandaga doimo ijobiy energiya va yaxshi kayfiyat ulashuvchi inson sifatida tanilgan.
Shu sababli G‘aybulla Tursunov tashabbus ko‘rsatib, Dildora opa uchun unutilmas kun tashkil etdi. Toshkent shahriga kelgan muxlisasi bilan uchrashgan san’atkor maxsus dasturxon yozdirib, samimiy suhbatlar qurdi.
Ushbu iliq va do‘stona muhitda o‘tgan uchrashuv har ikki tomon uchun ham quvonchli lahzalarga boy bo‘ldi. Ushbu voqea ijtimoiy tarmoqlarda katta e’tiborni qozondi va muxlislar tomonidan juda iliq kutib olindi.
Ko‘pchilik san’atkorning bunday odobli va e’tiborli yondashuvini yuqori baholadi. Bu holat ijrochi va uning muxlisi o‘rtasidagi haqiqiy hurmat, mehr va samimiyatning yorqin namunasi sifatida ko‘rildi.
