Turkiyalik mashhur xonanda Riza Tamer 42 yoshda vafot etdi

Turkiyalik mashhur xonanda Riza Tamer 42 yoshida vafot etdi. Bu haqda Zamin.uz xabar berdi.

Sanatchi Benden Sonra, Benim Yerime, Yan va Adam Olmaz kabi hit qoyshiqlari bilan ko‘plab muxlislar qalbida o‘rin egallagan va o‘zining betakror ijodi bilan tanilgan edi. Uning vafoti haqidagi xabarni Hurriyet nashri e’lon qildi.

Turkiya ommaviy axborot vositalarining xabar berishiga ko‘ra, xonanda Bodrum shahridagi uyida o‘zini yomon his qila boshlagach, zudlik bilan shifoxonaga yetkazilgan. Biroq tibbiyot xodimlari uni qutqarish uchun barcha choralarni ko‘rganlariga qaramay, xonandaning hayotini saqlab qolishning imkoni bo‘lmagan.

Dastlabki ma’lumotlarga ko‘ra, Riza Tamerning ahvoli shifokor tomonidan buyurilgan dori vositalarini qabul qilganidan so‘ng keskin og‘irlashgan. Ushbu holat shubhali deb topilgani sababli, hududiy prokuratura tomonidan tergov ishlari boshlab yuborildi.

Xonandaning o‘limiga aniq nima sabab bo‘lgani va dori vositalarining ta’siri qanchalik bo‘lgani sud tibbiy ekspertiza xulosasi chiqqandan keyin ma’lum bo‘ladi. Hozirgi vaqtda rasmiy organlar tomonidan yakuniy xulosa e’lon qilinmagan va tergov jarayonlari davom etmoqda.

Sanatchining vafoti muxlislari va yaqinlari uchun katta zarba bo‘ldi.