Abdulla Qurbonov ustozi Muxriddin Xoliqovdan olgan hayotiy saboq
Xonanda Abdulla Qurbonov 24/7 podcast dasturida ishtirok etib, o‘z ustozi Muxriddin Xoliqov bilan bog‘liq qiziqarli voqeani eslab o‘tdi. Bu haqda Zamin.uz xabar berdi.
San’atkorning aytishicha, bir safar ustozi bilan to‘y tadbiriga borishganida, haqiqiy hayotiy saboq olgan holat yuz bergan. Voqea davomida to‘y egasi tomonidan berilgan mablag‘lar Abdulla Qurbonovga topshirilgan.
Xonanda pullarni tartibga solayotgan vaqtda ularning orasidan kimdir qistirib qo‘ygan 20 dollar chiqib qolgan. Bu kutilmagan holat Muxriddin Xoliqovni biroz xavotirga solgan.
Ustoz san’atkor ushbu puldan qutulishni va uni darhol yo‘qotishni so‘ragan. Abdulla Qurbonov bu qarorning sababini so‘raganda, ustozi noto‘g‘ri yo‘lga kirib qolish yoki muammoga duch kelish ehtimoli borligi haqida aytgan.
Shogird hazil aralash pulni saqlab qo‘yishni va chet elga chiqqanda ishlatishni taklif qilgan bo‘lsa-da, Muxriddin Xoliqov qat’iy rad javobini bergan va begona puldan voz kechishni afzal ko‘rgan. Abdulla Qurbonov ushbu voqeani eslar ekan, ustozining bunday ehtiyotkorligi va halol fahmligi o‘zida chuqur taassurot qoldirganini ta’kidladi.
Suhbat davomida san’atkor 40 yillik ijodiy yo‘li haqida ham to‘xtalib o‘tdi. U xalq orasida mashhur bo‘lish va chin dildan e’tirof etilish turlicha ekanligini ta’kidladi.
Xonandaning aytishicha, uzoq yillar davomida minglab ijrochilarni ko‘rgan bo‘lsa-da, hamma ham xalqning haqiqiy sevimlisiga aylola olmaydi. Taniqlik va mashhurlik boshqa narsa, ammo insonlar qalbiga yo‘l topish va chin dildan e’zozlanish har bir san’atkorga nasib etmaydigan katta baxt ekanini qayd etdi.
