Ibrohim Totlisas barcha boyligini davlat ixtiyoriga vasiyat qildi
Turkiyaning taniqli xonandasi Ibrohim Totlisas o‘zining barcha boyligi va mulkini farzandlariga emas, balki davlat ixtiyoriga vasiyat qilishga qaror qilganini e’lon qildi. Bu haqda Zamin.uz xabar berdi.
San’atkor bu haqda shifoxonadan chiqqanidan so‘ng ommaviy axborot vositalari vakillari bilan bo‘lgan suhbatda ma’lum qildi. Uning ta’kidlashicha, farzandlariga bir tiyin ham meros qoldirmaydi, chunki ularning ayrimlari oilaning tinchligini buzgan va otasining qadriga yetmagan.
Ibrohim Totlisas o‘zining bugungi darajasiga mashaqqatli mehnat bilan erishganini, otasi oddiy oshpaz bo‘lgani va unga hech qanday moddiy boylik qoldirmaganini eslatib o‘tdi. Xonandaning fikricha, u farzandlariga eng katta merosni — o‘zining mashhur ismini bergan, biroq ular bu imkoniyatdan to‘g‘ri foydalanishni bilishmagan.
San’atkor o‘z mulkini xohlaganicha tasarruf etishga haqli ekanini alohida qayd etdi. Mutaxassislarning hisob-kitoblariga ko‘ra, Totlisasning umumiy boyligi yuzlab million dollarni tashkil etadi.
Uning tasarrufida Turkiyaning yirik shaharlarida joylashgan mehmonxonalar, hashamatli villalar, xonadonlar, umumiy ovqatlanish shoxobchalari, telekanallar va qimmatbaho avtomobillar parki mavjud. Shuncha boylikka qaramay, xonanda og‘ir kunlarida ayrim farzandlari uning holidan xabar olmaganidan qattiq ranjiganini yashirmadi.
Xonanda o‘z intervyusida faqatgina qizi Tug‘chadan minnatdor ekanini, o‘g‘li Ahmadni esa o‘z hayotidan butunlay o‘chirib tashlaganini bildirdi. Uning so‘zlariga ko‘ra, haqiqiy do‘stlar va sodiq insonlar og‘ir damlarda ma’lum bo‘ladi.
Totlisas agar otasi shunday ahvolda bo‘lganida, uni bir daqiqa ham yolg‘iz qoldirmasligini va hatto joni bilan yordam berishga tayyor bo‘lishini ta’kidladi. Shuningdek, san’atkor o‘zining tug‘ilib o‘sgan shahri Shonliurfada zamonaviy shifoxona tashkil etish niyati borligini aytdi.
U yerda o‘ziga tegishli bo‘lgan yer maydonini ushbu xayrli ish uchun ajratishga tayyorligini bildirdi. Bu tashabbus hudud aholisining tibbiy xizmat uchun boshqa shaharlarga borish ovoragarchiligini kamaytirishga xizmat qiladi.
Ma’lumot o‘rnida aytish joizki, Ibrohim Totlisas yaqinda o‘t pufagi bilan bog‘liq jiddiy xastalik tufayli jarrohlik amaliyotini boshdan kechirdi. Tibbiy muolajalar muvaffaqiyatli yakunlangach, shifokorlar uning salomatligi tiklanganini tasdiqlab, uyiga javob berishgan.
Hozirda xonanda o‘zini yaxshi his qilmoqda va ijtimoiy faoliyatini davom ettirish istagida.
