Jafar Jekson xalqaro tadbirda qatnashish uchun Toshkentga keladi
Gollivud kino olamining yosh va istiqbolli vakillaridan biri, afsonaviy Maykl Jekson hayotiga bag‘ishlangan biografik filmda bosh rolni ijro etgan Jafar Jekson ilk bor O‘zbekistonga tashrif buyuradi. Bu haqda Zamin.uz xabar berdi.
Mazkur tashrif mamlakatimiz madaniy hayotida muhim voqelik bo‘lishi kutilmoqda. Aktyor poytaxtimiz Toshkentda ilk bor tashkil etilayotgan nufuzli xalqaro tadbirda faxriy mehmon sifatida ishtirok etishi belgilangan.
Jafar Jekson joriy yilning 23 hamda 24-oktabr kunlari o‘tkaziladigan nufuzli xalqaro mukofotni topshirish marosimida qatnashadi. Ushbu tadbir jahon kinosanoati vakillarini bir davraga jamlashi bilan ahamiyatlidir.
Ma’lum qilinishicha, aktyorning O‘zbekistonga qiziqishi tasodifiy emas. Lissabon shahrida bo‘lib o‘tgan uchrashuv davomida xalqaro model Vazira Jon va uning turmush o‘rtog‘i, taniqli prodyuser Orlando Jon Jafar Jeksonga yurtimizning boy tarixi, noyob madaniyati va o‘zbek xalqining mehmondo‘stlik an’analari haqida so‘zlab berishgan.
Ushbu suhbatdan so‘ng yosh aktyor O‘zbekistonga kelish istagini bildirgan va safarni intiqlik bilan kutayotganini ta’kidlagan. Jafar Jekson o‘z intervyularidan birida mamlakatimiz haqida juda ko‘p iliq va chiroyli taassurotlar eshitganini, nufuzli xalqaro tadbirga taklif qilinganidan nihoyatda mamnun ekanini qayd etgan.
Uning so‘zlariga ko‘ra, O‘zbekiston kabi qadimiy o‘lkani o‘z ko‘zi bilan ko‘rish u uchun qiziqarli tajriba bo‘ladi. Jafar Jeksonning Toshkentga tashrifi nafaqat kino ixlosmandlari, balki keng jamoatchilik va san’at muxlislari uchun yilning eng kutilgan voqealaridan biriga aylanishi shubhasiz.
Bunday darajadagi yulduzlarning tashrifi O‘zbekistonning jahon madaniy maydonidagi nufuzini yanada oshirishga xizmat qiladi. Tadbir doirasida o‘tkaziladigan uchrashuvlar va marosimlar xalqaro hamkorlikni mustahkamlash hamda milliy kino san’atimizni dunyoga tanitish uchun yangi imkoniyatlar ochadi.
