O‘zbekiston xalq artisti Gulchehra Jamilova 80 yoshini nishonladi
O‘zbekiston madaniyati va san’ati olamida o‘chmas iz qoldirgan mahoratli aktrisa, O‘zbekiston xalq artisti Gulchehra Jamilova o‘zining qutlug‘ 80 yoshini qarshi oldi. Bu haqda Zamin.uz xabar berdi.
Shu munosabat bilan tashkil etilgan tantanali tadbirda Madaniyat vaziri Ozodbek Nazarbekovning samimiy tabrigi va ezgu tilaklari san’atkorga yetkazildi. Qutlov matnini vazirning birinchi o‘rinbosari Avazxon Tojixonov o‘qib berdi.
Tabrikda aktrisaning o‘zbek teatri va kinosidagi ko‘p yillik sermahsul faoliyati, sahnalarda va ekranlarda yaratgan betakror obrazlari hamda milliy madaniyatimizni yuksaltirishga qo‘shgan ulkan hissasi alohida e’tirof etildi. Darhaqiqat, Gulchehra Jamilova ijro etgan har bir rol o‘zining hayotiyligi va chuqur falsafasi bilan tomoshabinlar qalbidan munosib joy egallagan.
Tadbirning eng hayajonli daqiqalarida Gulchehra Jamilovaga Madaniyat va san’at fidokori ko‘krak nishoni topshirildi. Ushbu yuksak mukofot san’atkorning sohadagi ko‘p yillik fidokorona mehnati, yosh avlodni vatanparvarlik va milliy qadriyatlarga hurmat ruhida tarbiyalashdagi faol ishtiroki hamda madaniyat sohasini rivojlantirish yo‘lidagi xizmatlari uchun munosib ehtirom namunasi bo‘ldi.
Marosimda ishtirok etgan aktrisaning hamkasblari, shogirdlari va keng jamoatchilik vakillari so‘zga chiqib, uning insoniy fazilatlari hamda kasbiga bo‘lgan sadoqati haqida to‘lqinlanib gapirdilar. Soha vakillari Gulchehra Jamilovaning o‘zbek kinosi va teatri taraqqiyotidagi o‘rnini yuksak baholab, uning boy tajribasi bugungi kunda yosh ijodkorlar uchun haqiqiy mahorat maktabi bo‘lib xizmat qilayotganini ta’kidladilar.
Madaniyat vazirligi jamoasi va barcha san’atsevarlar nomidan yubilyarga uzoq umr, mustahkam sog‘lik, oilaviy xotirjamlik va kelgusi ijodiy ishlarida doimiy muvaffaqiyatlar tilab qolamiz. Uning san’at yo‘lidagi fidoyiligi kelajak avlodlar uchun har doim o‘rnak va ilhom manbai bo‘lib qoladi.
