Ali Niyazimbetov qo‘shig‘i buzilishiga jarima berildi

Adliya vazirligi huzuridagi Intellektual mulk departamenti matbuot xizmati tomonidan huquqbuzarga nisbatan chora ko‘rilgani haqida ma’lumot berildi. Bu haqida Upl.uz xabar berdi.

Ma’lum bo‘lishicha, Adliya vazirligiga "Azizim" qo‘shig‘i bilan mashhur bo‘lgan Ali Niyazimbetov murojaat qilgan. U o‘zining qo‘shig‘ini ruxsatsiz ijro etgan shaxslar haqida qonuniy choralar ko‘rilishini so‘ragan.

Tekshiruv natijasida uning "Azizim" qo‘shig‘i taniqli ijrochilar Manzura va Murodjon Yuldashev tomonidan ijro etilgani aniqlangan. Mazkur holat yuzasidan Murodjon Yuldashevga O‘zbekiston Respublikasi Ma’muriy javobgarlik to‘g‘risidagi kodeksining "Mualliflik huquqi va unga tutash huquqlarning buzilishi" moddasi bo‘yicha ma’muriy protokol tuzilgan.

Yunusobod tuman jinoyat ishlari bo‘yicha sudining qaroriga asosan unga 375 000 so‘m jarima jazo tariqasida belgilangan. Shunday qilib, qonuniy tartibda huquqbuzarlarga nisbatan tegishli choralar ko‘rildi.