Mirziyoyev Jizzaxda yangi loyihalarni tanishtirdi
Shavkat Mirziyoyev 22 iyul kuni Jizzax viloyatiga tashrifi davomida amalga oshirilishi rejalashtirilgan yangi loyihalar bilan tanishdi. Bu haqida Zamin.uz xabar berdi.
So‘nggi olti oyda viloyatda sanoat, xizmat ko‘rsatish va qishloq xo‘jaligi sohalarida jami 200 ta loyiha ishga tushirildi. Hududga jami 662 million dollar miqdorida investitsiya jalb qilindi.
Natijadorlikni oshirish maqsadida Zomin tumanida «Islohotlar shtabi» tashkil etildi. Yagona darcha tamoyili asosida qishloq xo‘jaligi xizmatlari bir joyda jamlangan «Agromarkaz» tashkil etildi.
Bu markaz orqali hosildorlikni oshirishga qaratilgan yangi usullar joriy qilinmoqda. Natijada oziq-ovqat mahsulotlari sifati yaxshilanib, aholi daromadi ko‘paymoqda.
Jizzaxda kartoshka yetishtirishni rivojlantirishga alohida e’tibor qaratilmoqda. Zomin ilmiy tajriba stansiyasida xorijiy va mahalliy seleksiyaga mansub 12 ta yangi nav urug‘lari sinovdan o‘tkazilmoqda.
Shuningdek, dukkakli ekinlar ekish, Zarbdor tumanida kanal bo‘yida nasos stansiyalari va magistral quvurlar qurish bo‘yicha rejalashtirilgan ishlar mavjud. Jizzaxning «Aydar-Arnasoy» ko‘llar tizimi qirg‘og‘ida zamonaviy turizm markazi barpo etilishi rejalashtirilmoqda.
Prezident Mirziyoyev ta’kidlashicha, tumanlarga sanoatni jalb etish va aholini ish bilan ta’minlash ustuvor vazifa hisoblanadi. Avval dasht bo‘lgan hududlarda hozirda zamonaviy korxonalar faoliyat yuritmoqda, aholining hunar va tomorqadan daromad olish imkoniyati kengaymoqda.
Yosh avlodning bilim va talabini hisobga olgan holda ularning farovon yashashi uchun zamin yaratish zarur. To‘g‘ri imkoniyatlardan foydalanilsa, Zomin tumani ishsizlik muammosidan xoli hududga aylanishi mumkin.
Ko‘kdala tumanining yangi markazida san’at saroyi, san’at maktabi, umumta’lim maktabi va sport majmuasi bir vaqtda barpo etilmoqda. Davlat rahbari bu obyektlarning bolalar uchun qulay bo‘lishi muhimligini ta’kidladi va kelgusidagi loyihalarda shu tajribani qo‘llash zarurligini bildirdi.
Shu asosda Zomin tumanida ham 300 o‘rinli madaniyat saroyi va san’at maktabi qurilishi rejalashtirilmoqda. Ushbu madaniyat saroyi tuman markazidagi 45 mingdan ortiq aholiga xizmat ko‘rsatadi.
Mutasaddilarga barcha rejalarning amalga oshirilishi va ijtimoiy-iqtisodiy sohalarning rivojlanishi bo‘yicha topshiriqlar berildi. Shu bilan prezidentning Jizzax viloyatiga tashrifi muvaffaqiyatli yakunlandi.
