Samarqand shahrining yoshi 3000 yilga yetkazildi
Samarqand viloyati xalq deputatlari kengashining navbatdagi sessiyasida Samarqand shahrining yoshi 3000 yil deb belgilandi. Bu haqida Zamin.uz xabar berdi.
Ushbu qaror arxeologik tadqiqotlar natijalari asosida qabul qilindi. Afrosiyob va Ko‘ktepa yodgorliklari hamda Ko‘ksaroy maydonidagi Amir Temur qasri joylashgan hududlarda olib borilgan izlanishlar shahar tarixining yanada qadimiyligini ko‘rsatmoqda.
Samarqand arxeologiya instituti direktori Muminxon Saidovning ta’kidlashicha, shahar tarixi 150 yildan ortiq vaqt davomida o‘rganib kelinmoqda. Ilgari shahar yoshi 1500 yil, keyinchalik 2000 yil deb hisoblangan.
1970 yilda bu ko‘rsatkich 2500 yilga yetkazilgan, 2000-yillar boshida esa o‘zbek-fransuz ekspeditsiyasi 2750 yil deb baholagan. 2024 yilda Ko‘ktepa hududida topilgan yangi arxeologik ma’lumotlar Samarqand tarixini yana qayta ko‘rib chiqishga asos bo‘ldi.
Tadqiqotchilar M. Isomidinov, Claude Rapin va M.
Hasanov yangi va avvalgi topilmalarni tahlil qilib, shahar miloddan avvalgi birinchi ming yillik boshlarida shakllangan urbanizatsiya markazi ekanligini aniqlashdi. Sessiya davomida taqdimot o‘tkazilib, Samarqandda shahar hayotining boshlanishi miloddan avvalgi ikkinchi ming yillik oxiri va birinchi ming yillik boshlariga to‘g‘ri kelishi qayd etildi.
Yig‘ilish yakunida ushbu ilmiy yangiliklar, materiallar va hujjatlar maxsus idoralarga o‘rganish va saqlash uchun topshirilishi belgilandi. Bu qaror Samarqand tarixini yanada chuqurroq o‘rganishga xizmat qiladi.
