O‘zbekiston va Pokiston hamkorligi yangi bosqichga ko‘tarildi
O‘zbekiston prezidenti Shavkat Mirziyoyev 19 avgust kuni Pokiston Shtablar boshliqlari birlashgan qo‘mitasi raisi, general Sahir Shamshod Mirzo boshchiligidagi delegatsiyani qabul qildi. Bu haqida Zamin.uz xabar berdi.
Prezident matbuot xizmati ma’lumotiga ko‘ra, yuqori martabali mehmon davlat rahbariga Pokiston Bosh vaziri Shahboz Sharifning salomi va eng ezgu tilaklarini yetkazdi. Uchrashuvda Pokiston bosh vazirining joriy yil fevral oyida O‘zbekistonga tashrifi davomida erishilgan kelishuvlarni amalga oshirish masalalari muhokama qilindi.
Shuningdek, O‘zbekiston va Pokiston o‘rtasidagi ko‘p qirrali hamkorlik va strategik sheriklik munosabatlarini yanada rivojlantirish haqida so‘z bordi. Turli darajalarda o‘zaro muloqot va almashinuvlarning faollashgani mamnuniyat bilan qayd etildi.
Joriy yil boshidan buyon tovar ayirboshlash hajmi 23 foizga, yuk tashish esa 50 foizga oshdi. Karachi va Lahor shaharlarida savdo uylari ochilishi ham ikki tomonlama iqtisodiy aloqalarni mustahkamlashga xizmat qilmoqda.
Bundan tashqari, to‘g‘ridan to‘g‘ri aviaqatnovlar soni ham ko‘paydi. Harbiy va harbiy-texnik sohalarda, shuningdek, xavfsizlikka doir zamonaviy tahdid va xatarlarga qarshi kurashish bo‘yicha hamkorlik masalalari ham ko‘rib chiqildi.
Ayniqsa, Transafg‘on temir yo‘lini qurish loyihasi bo‘yicha imzolangan uch tomonlama bitimni tez fursatda amalga oshirishga alohida e’tibor qaratildi. Ushbu uchrashuv ikki davlat o‘rtasidagi hamkorlikning yangi bosqichga ko‘tarilishini ta’minlashga xizmat qiladi.
Manba: prezident matbuot xizmati.
