Hududlarda xavfsizlikni oshirish uchun yangi punktlar ochiladi
Yurtimizda aholining osoyishtaligi va tinchligini ta’minlash maqsadida yangi chora-tadbirlar joriy etilmoqda. Bu haqida Zamin.uz xabar berdi.
Hukumat qarorlariga asosan jinoyatchilik ko‘p qayd etilgan hududlarda tartibni mustahkamlash va fuqarolarning xavfsizligini oshirish uchun maxsus huquqni muhofaza qilish punktlari tashkil etiladi. Ushbu punktlarda ichki ishlar va prokuratura xodimlari doimiy faoliyat olib borib, o‘z ish kunini aynan shu joyda boshlab, shu yerda yakunlaydilar.
Bu esa huquqni muhofaza qilish organlariga aholiga yaqin va tezkor xizmat ko‘rsatish imkonini beradi. Shuningdek, jamoat joylari hamda ko‘p qavatli uylar oldiga tezkor aloqa uchun “tashvish tugmalari” o‘rnatiladi.
Bu tugmalar yordamida fuqarolar shoshilinch vaziyatlarda huquqni muhofaza qiluvchi organlarga bevosita xabar berishlari mumkin bo‘ladi. Natijada qonunbuzarliklarning oldi olinib, xavfli holatlarga tezkor javob berish osonlashadi.
Mahallalarda aholi bilan ishlashning yangi usuli ham joriy qilinadi. Maxalla yettiliklaridan tanlab olingan targ‘ibotchilar doimiy ravishda fuqarolar bilan uchrashib, ularga huquqbuzarliklarning zararini tushuntirish va ularni oldini olish choralarini o‘rgatish bilan shug‘ullanadilar.
Bu esa jamoatchilikning jinoyatchilikka qarshi kurashdagi ishtirokini kuchaytiradi. Bundan tashqari, har uch kunda mojarolarga moyil oilalar va qonunbuzarlik sodir etgan shaxslar haqidagi ma’lumotlar yig‘ilib, tahlil qilinadi.
Huquqni muhofaza qiluvchi organlar ushbu tahlillar asosida muammoli hududlarni aniqlab, profilaktika ishlarini samarali yo‘naltiradilar. Ushbu chora-tadbirlar orqali mahallalarda tinchlik va xavfsizlikni ta’minlash yanada mustahkamlanadi.
Fuqarolarning huquq va manfaatlarini himoya qilish hamda jamoat tartibini saqlash davlat siyosatining ustuvor yo‘nalishlaridan biri hisoblanadi (manba: hukumat matbuot xizmati).
