2025 yilning 1 iyul holatiga ko‘ra, O‘zbekiston iqtisodiyotida ish bilan band bo‘lgan aholi soni 14,6 million nafarni tashkil etadi. Bu haqida Zamin.uz xabar berdi.
Kambag‘allikni qisqartirish va bandlik vazirligining ma’lumotlariga ko‘ra, ishsizlar soni 800 ming nafarga teng. Mehnat bozorida qamrab olinmagan aholi, ya’ni bolalar, talabalar, nafaqaxo‘rlar va boshqa guruhlar soni 22,5 millionni tashkil qiladi.
Shundan mehnatga layoqatli yoshgacha bo‘lgan aholi soni 12 million nafarni tashkil etadi. Markaziy bankning ta’kidlashicha, mamlakatda aholining doimiy o‘sib borishi va yoshlar tarkibining ko‘payishi iqtisodiy o‘sishni rag‘batlantirish bilan birga, kelajakda mehnat bozoriga bosim yaratishi mumkin.
Ayniqsa, hozirgi mehnatga layoqatli yoshgacha bo‘lgan aholi asta-sekin mehnat bozoriga qo‘shilib, ish o‘rinlariga talabni sezilarli darajada oshiradi. Bu esa bandlik darajasi, ish haqi va iqtisodiy unumdorlikka ta’sir ko‘rsatadi.
So‘nggi yillarda mehnatga layoqatli yoshdagi, ya’ni 15 dan 64 yoshgacha bo‘lgan aholi sonining o‘sish sur’ati ancha oshgan. Masalan, 2022 yilda bu o‘sish sur’ati 0,8 foiz bo‘lgan bo‘lsa, 2025 yilning ikkinchi choragida u 1,4 foizga yetdi.
Bu o‘zgarish aholining tarkibiy o‘zgarishi, yoshlar ulushining oshishi va ularning mehnat bozoriga tez kirib kelishi bilan bog‘liq. Kelgusida ushbu tendensiya saqlanib qolsa va mehnat bozorida ishchi kuchi samarali o‘zlashtirilsa, bu iqtisodiy o‘sishni qo‘llab-quvvatlash bilan birga talab tomondan inflyatsion bosimning oshishiga sabab bo‘lishi mumkin.
Manba: Markaziy bank va Kambag‘allikni qisqartirish va bandlik vazirligi ma’lumotlari.
