Markaziy bank mikromoliya faoliyatini tartibga soldi
Markaziy bank boshqaruvi moliya sohasida muhim qaror qabul qilib, mikromoliya tashkilotlari va banklarning faoliyatini tartibga soluvchi yangi nizomni tasdiqladi. Bu haqida Zamin.uz xabar berdi.
Ushbu hujjat moliya muassasalarining faoliyat yo‘nalishini o‘zgartirishda amal qilinadigan talab va qoidalarni belgilaydi. Endilikda mikromoliya tashkiloti mikromoliya bankiga aylanishi, mikromoliya banki to‘liq bankka aylanishi, bank mikromoliya banki maqomiga o‘tishi yoki mikromoliya banki yana mikromoliya tashkiloti sifatida faoliyat yuritishi mumkin.
Agar mikromoliya tashkiloti mikromoliya bankiga aylanishni istasa, u aksiyadorlik jamiyati shaklida tashkil etilgan bo‘lishi shart. Yangi nizomga ko‘ra, mikromoliya bankini tashkil etish ikki bosqichda amalga oshiriladi: dastlabki ruxsatnoma berish va bankni ro‘yxatdan o‘tkazish hamda litsenziya taqdim etish.
Banklar, mikromoliya banklari yoki mikromoliya tashkilotlari o‘z faoliyat turini o‘zgartirish uchun Markaziy bankka elektron ariza bilan murojaat qiladilar. Arizalar “Banklar va bank faoliyati to‘g‘risida” hamda “Nobank kredit tashkilotlari va mikromoliyalashtirish faoliyati to‘g‘risida”gi qonunlarga muvofiq ko‘rib chiqiladi.
Ariza ko‘rib chiqish uchun belgilangan to‘lovlar ham mavjud. Dastlabki ruxsatnoma uchun belgilangan to‘lov BHMning besh baravariga teng, litsenziya uchun esa ustav kapitalining eng kam miqdorining 0,1 foizi miqdorida to‘lov olinadi.
Litsenziyani qayta rasmiylashtirish uchun esa ushbu miqdorning yarmi to‘lanadi. Ushbu yangi tartib moliya bozorida shaffoflikni oshirish, tizimni mustahkamlash va faoliyat o‘tish jarayonlarini yanada tartibli qilishga xizmat qiladi.
Manba: zamin.uz
