Mirziyoyev va Zampolli O‘zbek-AQSH hamkorligini muhokama qildi
Prezident Shavkat Mirziyoyev 28-avgust kuni O‘zbekistonda amaliy tashrif bilan bo‘lgan AQSH prezidenti maxsus vakili Paolo Zampolli bilan uchrashdi. Bu haqida Zamin.uz xabar berdi.
Uchrashuv davomida O‘zbekiston va AQSH o‘rtasidagi strategik sheriklik hamda ko‘p qirrali hamkorlik munosabatlarini yanada rivojlantirish masalalari muhokama qilindi. Turli darajalarda samarali aloqalar davom etayotgani alohida ta’kidlandi.
Xavfsizlik sohasida, jumladan terrorizm, ekstremizm va noqonuniy migratsiyaga qarshi kurashishda hamkorlik samarali yo‘lga qo‘yilgan. AQSH an’anaviy ravishda O‘zbekistonning muhim iqtisodiy hamkori hisoblanadi.
2024-yilda ikki davlat o‘rtasida tovar ayirboshlash hajmi 15 foizga oshdi. Loyihalar portfeli 11 milliard dollardan ko‘proqni tashkil etadi.
Joriy yil iyun oyida Toshkentda o‘tkazilgan investitsiya forumida AQSHning yuzdan ortiq yetakchi kompaniyalari ishtirok etdi. Mineral resurslar, aviatsiya, elektrotexnika, qishloq xo‘jaligi, raqamli texnologiyalar, moliya, innovatsiyalar va ta’lim sohalarida hamkorlikni rivojlantirish uchun katta imkoniyatlar mavjudligi ta’kidlandi.
Shuningdek, «S5+1» formati doirasida mintaqaviy hamkorlikni mustahkamlash muhimligi qayd etildi. Bo‘lajak muloqotlar va qo‘shma tadbirlar rejasi ham ko‘rib chiqildi.
Manba: zamin.uz.
