Mirziyoyev Xitoyda SHHT sammitida ishtirok etadi
O‘zbekiston Respublikasi Prezidenti Shavkat Mirziyoyev 30 avgustdan 3 sentyabrgacha Xitoy Xalq Respublikasiga rasmiy tashrif bilan boradi. Bu haqida Zamin.uz xabar berdi.
Ushbu tashrif Xitoy rahbari Si Szinpinning taklifi asosida amalga oshiriladi. O‘zbekiston rahbari matbuot xizmati bu haqda ma’lumot berdi.
Mirziyoyev 31 avgust va 1 sentyabr kunlari Tyanszin shahrida o‘tadigan Shanxay Hamkorlik Tashkiloti davlat rahbarlari kengashi majlisi hamda “SHHT plyus” formatidagi sammitda ishtirok etadi. Mazkur tadbirlar davomida tashkilot a’zolari o‘rtasida ko‘p tomonlama hamkorlikni kengaytirish hamda SHHT faoliyatini yanada takomillashtirish masalalari muhokama qilinadi.
Tadbirlar yakunida Tyanszin deklaratsiyasi qabul qilinishi kutilmoqda. Shuningdek, xavfsizlik, raqamli iqtisodiyot, yashil sanoat, energetika, turizm va boshqa ustuvor sohalarda sheriklikni mustahkamlashga qaratilgan qo‘shma hujjatlar va qarorlar imzolanishi rejalashtirilgan.
Bu hujjatlar O‘zbekiston va SHHT mamlakatlari o‘rtasidagi strategik sheriklikni rivojlantirishga xizmat qiladi. 2 sentyabr kuni Prezident Mirziyoyev Pekinda Xitoy rahbari Si Szinpin bilan ikki tomonlama muzokaralar olib boradi.
Shuningdek, u Xitoyning rasmiy shaxs va yirik kompaniya rahbarlari bilan uchrashib, amaliy hamkorlik va investitsiya loyihalarini kengaytirish imkoniyatlarini muhokama qiladi. 3 sentyabr kuni esa O‘zbekiston Prezidenti Ikkinchi jahon urushidagi G‘alabaning 80 yilligiga bag‘ishlangan tantanali marosimlarda ishtirok etadi.
Xitoyning “Sinxua” axborot agentligi ma’lumotlariga ko‘ra, ushbu tadbirda 26 ta davlat rahbari va hukumat boshliqlari qatnashadi. Xitoyga tashrif chog‘ida birinchi bo‘lib Rossiya Prezidenti Vladimir Putin ishtirok etishi rejalashtirilgan.
Keyingi qatnashchi Shimoliy Koreya yetakchisi Kim Chen In bo‘ladi. Shuningdek, marosimlarda Kambodja, Vetnam, Laos, Indoneziya, Malayziya, Mo‘g‘uliston, Pokiston, Nepal, Maldiv orollari, Qozog‘iston, O‘zbekiston, Tojikiston, Qirg‘iziston, Turkmaniston, Belarus, Ozarbayjon, Armaniston, Eron, Kongo, Zimbabve, Serbiya, Slovakiya, Kuba va Myanma davlat va hukumat rahbarlari ham ishtirok etadi.
Mazkur tashrif O‘zbekiston uchun nafaqat strategik sheriklikni mustahkamlash, balki mintaqaviy va global maydonda diplomatik hamda investitsiyaviy imkoniyatlarni kengaytirish uchun muhim ahamiyatga ega. Shu bilan birga, Prezident Mirziyoyevning SHHT sammitidagi ishtiroki va Pekindagi paradda qatnashishi mamlakatning xalqaro maydondagi mavqeini yanada oshirishga xizmat qiladi (manba: zamin.uz).
