Qirgʻiziston Milliy xavfsizlik davlat qoʻmitasi chegara xizmati maʼlumotlariga koʻra, O‘zbekiston chegarachilari ikki qirgʻiz fuqarosini qoʻlga olish jarayonida qurol ishlatgan va natijada ular halok boʻlgan. Bu haqida Zamin.uz xabar berdi.
25-avgust kuni Chotqol tumanidagi Aygʻir-Jal qishlogʻida yashovchi ikki kishi yoʻqolgani haqida huquq-tartibot organlariga murojaat qilindi. Bu xabar darhol tegishli idoralar tomonidan qayd etilib, vaziyat oʻrganishga olindi.
Keyinchalik, 28-avgust kuni ikki davlat chegara vakillari uchrashuvi chogʻida O‘zbekiston tomoni 15-avgust kuni Qirgʻiziston, O‘zbekiston va Qozogʻiston chegaralari tutashgan hududda ikki nomaʼlum shaxs aniqlangani haqida maʼlumot berdi. O‘zbekiston chegarachilari ularni toʻxtatishga harakat qilgan, ammo fuqarolar talablarga boʻysunmagan va shuning natijasida qurol ishlatilgan.
Ushbu voqea oqibatida ikki kishi oʻqdan halok boʻlgan. 31-avgust kuni marhumlarning qarindoshlari O‘zbekistonga kelib, jasadlarni tanib olgan va ular ekspertiza uchun Qirgʻizistonga topshirilgan.
Shuningdek, oʻldirilgan shaxslarga tegishli mol-mulklar — uchta ot va bir chodir ham qaytarib berildi. Qirgʻiziston va O‘zbekiston chegara xizmatlari 2-sentyabrdan boshlab ushbu fojiali holat yuzasidan qoʻshma tergov va tahlil ishlarini olib borishni rejalashtirmoqda.
Bu choralar ikki davlat chegara xavfsizligini taʼminlash, vaziyatni aniq tushunish va kelgusida shunday hodisalarning oldini olishga qaratilgan (manba: zamin.uz).
