Mirziyoyev va Si Szinpin O‘zbekiston-Xitoy hamkorligini kengaytirdi
Pekin shahrida O‘zbekiston Respublikasi Prezidenti Shavkat Mirziyoyev va Xitoy Xalq Respublikasi Raisi Si Szinpin o‘rtasida o‘tkazilgan uchrashuv hamda muzokaralar yakunida ikki mamlakat o‘rtasida muhim hujjatlarni almashish marosimi bo‘lib o‘tdi. Bu haqida Zamin.uz xabar berdi.
Ushbu marosim ikki davlat o‘rtasidagi munosabatlarda yangi bosqichni boshlab berdi. Asosiy hujjatlar qatorida “O‘zbekiston–2030” strategiyasi va “Bir makon, bir yo‘l” tashabbusini uyg‘unlashtirishga qaratilgan hamkorlik dasturi imzolandi.
Shuningdek, madaniyat markazlarini tashkil etish hamda tibbiy xizmatlar sohasida hamkorlik to‘g‘risidagi kelishuvlar ham tasdiqlandi. Tashrif doirasida bir qator yo‘nalishlarda hamkorlikni mustahkamlash bo‘yicha kelishuvlarga erishildi.
Jumladan, O‘zbekistonga zamonaviy texnik kemalar – zemsnaryadlar yetkazib berish loyihasining ikkinchi bosqichi ishlab chiqilishi, texnik va iqtisodiy hamkorlikni kengaytirish, mahsulot va xizmatlarda muvofiqlikni baholash bo‘yicha qo‘shma ishlar olib borilishi belgilandi. Bundan tashqari, O‘zbekistondan Xitoyga qovun va bodom yetkazib berishda fitosanitariya talablariga qat’iy rioya qilish bo‘yicha kelishuvlar amalga oshiriladi.
Kosmik fanlar va texnologiyalarni tinchlik maqsadlarida qo‘llash, raqobat siyosatini mustahkamlash, inson resurslarini rivojlantirish va raqamli iqtisodiyot sohasida sheriklikni kengaytirish ham uchrashuvda ko‘zda tutilgan muhim yo‘nalishlardandir. Shuningdek, Samarqand viloyati bilan Tyanszin shahri o‘rtasida qardoshlik va sheriklik munosabatlari o‘rnatilishi ham belgilandi.
O‘zbekiston Savdo-sanoat palatasi va Xitoy Xalqaro savdoga ko‘maklashish kengashi o‘rtasida qo‘shma hamkorlik yo‘lga qo‘yiladi. Ushbu kelishuvlar ikki davlat o‘rtasidagi iqtisodiy, madaniy va mintaqaviy hamkorlikni yangi darajaga olib chiqadi.
Manba: zamin.uz
