Mirziyoyevning Xitoyga amaliy tashrifi muvaffaqiyatli yakunlandi
O‘zbekiston Respublikasi Prezidenti Shavkat Mirziyoyevning Xitoyga amaliy tashrifi muvaffaqiyatli yakunlandi. Bu haqida Zamin.uz xabar berdi.
Tashrif davomida davlat rahbari ko‘plab xalqaro va ikki tomonlama tadbirlarda faol ishtirok etdi. 31 avgust kuni prezident va rafiqasi Tyanszin shahridagi Meyszyan kongress markazida Shanhay hamkorlik tashkiloti sammitining norasmiy qismida qatnashdilar.
1 sentyabrda esa SHHT Davlat rahbarlari kengashining navbatdagi yig‘ilishi hamda SHHT plus formatidagi muhokamalarda ishtirok etib, hamkorlikni yanada rivojlantirish uchun bir qator takliflar va tashabbuslarni ilgari surdi. 2 sentyabrda Pekin shahrida Xitoy Xalq Respublikasi Raisi Si Szinpin bilan rasmiy muzokaralar bo‘lib o‘tdi.
Uchrashuv yakunida ikki davlat o‘rtasida amaliy hamkorlikni mustahkamlashga qaratilgan muhim hujjatlar imzolandi. Shu kuni Mirziyoyev Rossiya Prezidenti Vladimir Putin bilan ham uchrashib, ikki tomonlama aloqalarning dolzarb masalalarini muhokama qildi.
Shuningdek, Xitoy bosh vaziri Li Syan, xorijiy delegatsiya rahbarlari va yirik biznes vakillari bilan samarali muloqotlar tashkil etildi. 3 sentyabr kuni davlat rahbari Pekinda Ikkinchi jahon urushi yakunlanganining 80 yilligiga bag‘ishlangan tantanali g‘alaba paradida ishtirok etdi.
Tashrif dasturi muvaffaqiyatli yakunlangach, prezident va rasmiy delegatsiya Toshkentga qaytish uchun jo‘nab ketdi. Xitoy davlat arboblari oliy martabali mehmonlarni samimiy kuzatib qo‘ydi.
Manba: zamin.uz
