Yosh olimlar uchun Texasda stajirovka tanlovi e’lon qilindi
O‘zbekistonda innovatsion rivojlanish va ilmiy salohiyatni oshirish maqsadida Innovatsion rivojlanish agentligi yosh olimlar uchun maxsus tanlov e’lon qildi. Bu haqida Zamin.uz xabar berdi.
Ushbu tanlov yosh olimlarning xorijiy ilmiy va tadqiqot muassasalarida malakasini mustahkamlashi hamda ilmiy tajriba to‘plashini ta’minlashga qaratilgan. Tanlov O‘zbekiston Respublikasi Prezidentining 2024-yil 25-dekabrdagi PQ-455-son qarori hamda Vazirlar Mahkamasining 2021-yil 19-apreldagi 222-son qarori asosida tashkil etilmoqda.
Tanlovda saralangan yosh olimlar 2025-yil davomida AQSHning Texas universitetida olti oylik ilmiy stajirovkada ishtirok etadi. Ushbu stajirovka davomida ular aniq ilmiy vazifalarni bajarish, yangi tajribalar orttirish va malakasini oshirish imkoniyatiga ega bo‘ladi.
Nomzodlarni tavsiya qilish jarayoni oliy ta’lim muassasalari va ilmiy tadqiqot tashkilotlari tomonidan amalga oshiriladi. Hujjatlar faqat “internship.ilmiy.uz” yagona elektron platformasi orqali qabul qilinadi.
Boshqa manzillar yoki pochta orqali yuborilgan hujjatlar ko‘rib chiqilmaydi. Tanlov jarayonida ma’lumotlarning to‘liqligi va haqqoniyligini ta’minlash, shuningdek, tavsiya etilgan nomzodlarning stajirovkada qatnashishini kafolatlash mas’uliyati buyurtmachi tashkilot rahbariga yuklanadi.
Bu esa tanlovning shaffof va adolatli o‘tishini ta’minlaydi. Manba: zamin.uz
