O‘zbekistonda ish tashlash huquqi qonuniy kafolatlandi

O‘zbekistonda ilk bor ishchilarning ish tashlash huquqi qonuniy ravishda kafolatlanmoqda. Bu haqida Zamin.uz xabar berdi.

9 sentyabr kuni Oliy Majlis Qonunchilik palatasida Senat taklifiga muvofiq mehnat sohasidagi milliy qonunchilik xalqaro standartlarga yaqinlashtirilishi muhokama qilindi. Ushbu o‘zgarishlar mehnat huquqlarini mustahkamlashga xizmat qiladi va xalqaro mehnat tashkilotining tegishli konvensiyalariga to‘liq mos kelishini ta’minlaydi.

Ish tashlash huquqi jamoaga beriladigan muhim huquq bo‘lib, u orqali ishchilar tashkilot yoki korxona rahbariyati bilan kelishmovchilik yuzaga kelganda o‘z talablarini ifoda etish uchun ish jarayonini vaqtincha to‘xtatishi mumkin. Bu huquq demokratik boshqaruv, tenglik va ijtimoiy adolat prinsiplarini amalda mustahkamlashga xizmat qiladi hamda mehnat nizolarini hal etishda samarali vosita hisoblanadi.

Qonun loyihasi 9 ta moddadan iborat bo‘lib, unda ikki qonun va to‘rt kodeksga o‘zgartirishlar kiritiladi. Eng asosiy yangilik – Mehnat kodeksida ish tashlashning aniq ta’rifining birinchi bor kiritilishi.

Shuningdek, ish tashlashni boshlash tartib-taomillari, ishchilar uchun kafolatlar, ish tashlashni kechiktirish va qayta tiklash mexanizmlari hamda cheklovlar aniq belgilab qo‘yiladi. Bu o‘zgarishlar milliy qonunchilikdagi bo‘shliqlarni bartaraf etib, ishchilarning huquqlarini xalqaro standartlarga moslashtiradi.

Yangi tahrirdagi Konstitutsiyaning 98-moddasiga muvofiq, yuz mingdan ortiq saylov huquqiga ega bo‘lgan fuqarolar, Senat, ombudsman va Markaziy saylov komissiyasi qonunchilik tashabbusi huquqiga ega. Shu asosda avval ombudsman, keyin esa Senat tomonidan qonunchilik takliflari kiritilgan.

Bu jarayon mamlakatdagi demokratik islohotlarning amalda qanday amalga oshirilayotganini ko‘rsatadi (kursiv.media).