Yerda kuchli magnit bo‘roni 6 kun davom etadi
So‘nggi uch oy ichida Yerda eng kuchli magnit bo‘roni kuzatilmoqda. Bu haqda Zamin.uz xabar berdi.
Bu haqda 15 sentyabr kuni Quyosh astronomiyasi laboratoriyasi ma’lum qildi. Bo‘ronning yuzaga kelishi sayyoramizga katta koronal teshik zonasi orqali Quyosh shamoli oqimining kirishi bilan bog‘liqdir.
Mutaxassislarning fikricha, geomagnit faollikning bunday darajada oshishi kutilmagan hodisa bo‘ldi. Avvalgi taxminlarga ko‘ra, faollik G1 darajasidan yuqori bo‘lmasligi, ya’ni zaif buzilishlar kuzatilishi kutilgan edi.
Biroq, oxirgi voqea ancha kuchli bo‘lib chiqdi. Shu yilning 1-2 iyun kunlari ham shunga o‘xshash kuchli magnit bo‘roni qayd etilgan edi.
Geomagnit vaziyatning yomonlashuvi taxminan to‘rtdan olti kungacha davom etishi kutilmoqda. Yerga yaqin kosmosdagi sharoit esa joriy hafta oxiridan oldin to‘liq normallashishi mumkin.
Ekspertlar koronal teshiklarning ta’siri barqaror emasligini ta’kidlamoqda. Bo‘ron odatda bir necha soat davom etadigan alohida portlashlar ko‘rinishida namoyon bo‘ladi va bu jarayonda magnit faollik vaqtincha zaiflashishi ham kuzatiladi.
Dastlabki hisob-kitoblarga ko‘ra, joriy mahalliy faollik 6-9 soat ichida pasayishi ehtimoli mavjud. Shunga qaramay, mutaxassislar hodisalarning aniq rivojini oldindan aytish qiyinligini va prognozlardan farq qilish hollari bo‘lishi mumkinligini bildiradi.
Oldinroq ma’lum qilinishicha, o‘tgan hafta oxiridan boshlab Yer Quyoshdagi yirik koronal teshikdan chiqayotgan shamol oqimiga kirgan edi. Shu sababli geomagnit bezovtaliklar olti kungacha davom etishi mumkinligi, eng yuqori faollik esa 14-16 sentyabr kunlariga to‘g‘ri kelishi taxmin qilingan edi (manba: zamin.uz).
