Mirziyoyev va ITB hamkorlikni kengaytirishni muhokama qildi
2025-yil 17-sentyabr kuni Namangan shahrida bo‘lib o‘tgan "Kambag‘allikdan farovonlik sari" xalqaro forumi doirasida O‘zbekiston Respublikasi Prezidenti Shavkat Mirziyoyev Islom taraqqiyot banki prezidenti Muhammad bin Sulaymon al-Jassir bilan uchrashdi. Bu haqda Zamin.uz xabar berdi.
Uchrashuvda forumning muvaffaqiyatli o‘tkazilgani ta’kidlandi va ITB O‘zbekistonda kambag‘allikni kamaytirish bo‘yicha vazifalarni qo‘llab-quvvatlashga tayyor ekanligini bildirdi. Muloqotda mamlakatimizdagi islohotlar strategiyasini amalga oshirish uchun Bank guruhi bilan hamkorlikni kengaytirish muhimligi qayd etildi.
So‘nggi yillarda ITB bilan sheriklik sezilarli darajada rivojlanib, qo‘shma loyihalar portfeli 5 milliard dollardan oshgan. Ushbu loyihalar transport, infratuzilma, uy-joy qurilishi, energetika, sog‘liqni saqlash va ta’lim sohalarini qamrab oladi.
Shuningdek, investitsiyalarning 40 foizdan ortig‘i xususiy sektorga yo‘naltirilmoqda. Prezident Mirziyoyev loyihalar portfelini ikki barobar oshirish, infratuzilma, ijtimoiy soha va xususiy sektor loyihalarini moliyalashtirish hajmini kengaytirish bo‘yicha uzoq muddatli strategik sheriklik dasturini qabul qilish tashabbusini ilgari surdi.
Uchrashuvda xususiy biznesni rivojlantirish, hududlarda zamonaviy tibbiyot markazlarini barpo etish, avtomobil yo‘llarini modernizatsiya qilish, irrigatsiya kanallarini tiklash va betonlash kabi aniq loyihalarga e’tibor qaratildi. Ushbu muloqot mamlakatimiz taraqqiyotida hamkorlikni yanada mustahkamlashga xizmat qiladi.
Manba: zamin.uz
