O‘zbekiston va Britaniya mehnat hamkorligini kuchaytirdi
London shahrida muhim uchrashuv bo‘lib o‘tdi. Bu haqda Zamin.uz xabar berdi.
Unda Vazirlar Mahkamasi huzuridagi Migratsiya agentligi rahbari Behzod Musayev, Buyuk Britaniyadagi favqulodda va muxtor elchi Ravshan Usmonov hamda Britaniyaning Mehnat ta’minotchilari uyushmasi bosh direktori Devid Kamp ishtirok etdi. Uchrashuvda ikki tomonlama hamkorlik masalalari muhokama qilindi.
Devid Kamp O‘zbekiston Migratsiya agentligi bilan hamkorlikni yangi bosqichga olib chiqishga tayyor ekanligini bildirdi. U o‘zbek yoshlarini Angliyadagi korxonalarga ishga joylashtirish uchun keng imkoniyatlar yaratish niyatida ekanini ta’kidladi.
Muzokaralarda Buyuk Britaniyaning mavsumiy ishchilar dasturi bo‘yicha kelishuvlarga alohida e’tibor qaratildi. Tomonlar O‘zbekiston fuqarolari uchun kvotalar sonini oshirish, yangi mavsumiy operatorlar bilan kelishuvlar tuzish va ishga qabul jarayonlarini xavfsiz va tizimli tarzda tashkil etish bo‘yicha kelishib oldilar.
ALP tashkiloti Buyuk Britaniyada mavsumiy mehnat, oziq-ovqat sanoati, logistika va boshqa yirik sohalarda faoliyat yuritadi. Hozirda unga 300 dan ortiq yirik kompaniyalar a’zo hisoblanadi.
Ushbu uchrashuv O‘zbekiston yoshlari uchun Angliyada munosib mehnat sharoitida ishlash imkoniyatlarini kengaytirishga xizmat qiladi. Bu esa yoshlarimizning xorijda ish topish va malakalarini oshirishlariga yordam beradi.
Manba: zamin.uz
