Ehtiyojmand oilalarga 1 million so‘mlik yordam beriladi
2025-2026 yilgi qishki isitish mavsumida aholining ehtiyojmand qatlamini qo‘llab-quvvatlash maqsadida muhim tashabbus amalga oshiriladi. Bu haqda Zamin.uz xabar berdi.
Noyabr oyida “Ijtimoiy himoya yagona reyestri”, “Kambag‘al oilalar reyestri” hamda “Mahalla yettiligi” tomonidan aniqlangan oilalarga bir martalik 1 million so‘mlik moddiy yordam beriladi. Hozirda “Ijtimoiy himoya yagona reyestri” va “Kambag‘al oilalar reyestri”da 816 mingga yaqin oila qayd etilgan.
Bundan tashqari, “Mahalla yettiligi” qo‘shimcha ravishda 317 mingdan ortiq oilani ehtiyojmand deb topib, ro‘yxatga kiritgan. Moddiy yordam birinchi navbatda quyidagi toifalarga beriladi: asosiy boquvchisini yo‘qotgan oilalar; tarkibida I yoki II guruh nogironi bor oilalar; nogiron bolaga qarovchi shaxslar; gaz va markaziy isitish tizimidan foydalanmaydigan uylar aholisi; bir xonadonda uch va undan ortiq oila a’zolari birga yashaydigan holatlar; og‘ir kasallikka chalingan yoki boshqalarning parvarishiga muhtoj shaxslar.
Yordam olishni istaganlar o‘z arizalarini 25 sentyabrga qadar yashash joyidagi “Mahalla yettiligi”ga topshirishlari lozim. Ushbu tashabbus aholining ijtimoiy himoyasini mustahkamlashga qaratilgan muhim chora hisoblanadi.
Manba: zamin.uz
