O‘zbekiston va Keniya o‘rtasida diplomatik aloqa boshlandi
O‘zbekiston Respublikasi va Keniya o‘rtasida yangi tarixiy bosqich boshlanib, rasmiy diplomatik munosabatlar yo‘lga qo‘yildi. Bu haqda Zamin.uz xabar berdi.
Ushbu muhim voqea 20-sentabr kuni Nyu-York shahrida sodir bo‘ldi. Tadbirda O‘zbekiston tashqi ishlar vaziri Baxtiyor Saidov hamda Keniya bosh vaziri, tashqi ishlar va diaspora ishlari vaziri Musaliya Mudavadiy ishtirok etdi.
Ular ikki davlat o‘rtasida diplomatik aloqalarni o‘rnatish haqidagi rasmiy hujjatni imzoladilar. Imzolash marosimidan so‘ng Baxtiyor Saidov Keniya Afrikaning eng tez rivojlanayotgan va barqaror iqtisodiy o‘sishga erishayotgan mamlakatlaridan biri ekanligini ta’kidladi.
Shuningdek, u Keniya hozirda texnologiya va innovatsiyalar sohasida mintaqaning yetakchi markazlaridan biri sifatida e’tirof etilayotganini bildirdi. Tomonlar suhbat davomida ikki xalq manfaatlariga xizmat qiladigan keng qamrovli hamkorlik yo‘nalishlarini muhokama qildilar.
Bu hamkorlik savdo, investitsiya, texnologiya va madaniy sohalarni rivojlantirish imkoniyatlarini kengaytirishga qaratilgan. Shuningdek, Keniya O‘zbekiston bilan diplomatik munosabat o‘rnatgan 163-davlat sifatida tarixda qoldi.
Bu Toshkentning Afrika qit’asi bilan yangi darajadagi muloqot va sheriklik siyosatining muhim bosqichi hisoblanadi (manba: zamin.uz).
