O‘zbekistonda atom elektr stansiyasi quriladi
26 sentyabr kuni Moskvada o‘tkazilgan “Jahon atom haftaligi” forumi doirasida Azim Ahmadxo‘jayev Spot nashriga bergan intervyusida O‘zbekistonda atom elektr stansiyasi qurilishi elektr energiyasi narxining pasayishiga olib kelishini ma’lum qildi. Bu haqda Zamin.uz xabar berdi.
Uning so‘zlariga ko‘ra, investitsiya davri tugagach, 1 kVt/soat energiya ishlab chiqarish xarajatlari sezilarli darajada kamayadi. Quvvatlar ko‘payishi tizim samaradorligini oshiradi va iqtisodiy qonuniyatlarga muvofiq narxlarning pasayishi tabiiy jarayon hisoblanadi.
Ahmadxo‘jayev atom energiyasini kelajakda katta ahamiyatga ega soha sifatida baholadi. U ta’kidlashicha, ko‘mir energiyasi o‘z ahamiyatini yo‘qotgan, tabiiy gaz esa yuqori qo‘shilgan qiymatga ega mahsulotlarni ishlab chiqarishda samaraliroq ishlatilishi kerak.
Shuningdek, atom energetikasi mamlakat energiya xavfsizligini ta’minlashda muhim rol o‘ynaydi. Bundan avval “O‘zatom” va Rossiyaning “Rosatom” korporatsiyasi O‘zbekistonda quriladigan atom elektr stansiyasining yangilangan loyihasi bo‘yicha kelishuvga erishgan edi.
Yangi loyiha tarkibiga ikkita yirik quvvatli VVER-1000 (3+ avlod) energobloki va har biri 55 MVt quvvatga ega bo‘lgan ikki ta RITM-200N kichik reaktor kiritildi. Ushbu bitim mamlakat energetika sohasida yangi bosqich boshlanishini bildiradi (manba: zamin.uz).
