Moskvada o‘tgan xalqaro forumda “O‘zatom” agentligi rahbari Azim Ahmadxo‘jayev mamlakatda atom elektr stansiyasi qurilishi natijasida elektr energiyasi tannarxi kamayishi mumkinligini ta’kidladi. Bu haqda Zamin.uz xabar berdi.
Unga ko‘ra, dastlabki katta sarmoya kiritilgandan so‘ng har bir kilovatt soat uchun energiya ishlab chiqarish xarajatlari sezilarli darajada arzonlashadi. Ahmadxo‘jayevning fikricha, ishlab chiqarish quvvati oshgani sayin energiya ishlab chiqarish jarayoni optimallashtiriladi va bu aholi hamda iqtisodiyot uchun narxlarning pasayishiga olib keladi.
Biroq iqtisodchi Otabek Bakirov bu fikrga shubha bilan qaraydi. Uning ta’kidlashicha, atom elektr stansiyasi qurilishi ko‘pincha arzon energiya va’dasi bilan asoslansa-da, amalda atom energiyasi gaz, shamol yoki gidroenergiya manbalariga nisbatan qimmatroq bo‘lishi mumkin.
Shuning uchun elektr energiyasi narxlarining pasayishi haqidagi da’volar aniq asosga ega emas. Jizzax viloyatining Forish tumanida kichik quvvatga ega atom elektr stansiyasi qurilishi boshlangan.
Loyihaga ko‘ra, stansiyani to‘liq ishga tushirish uchun kamida yetti-sakkiz yil vaqt talab etiladi. Shu bilan birga, mamlakatda atom elektr stansiyasini qurish energiya ta’minotini diversifikatsiya qilish va barqarorligini ta’minlashda muhim ahamiyatga ega bo‘lishi mumkin.
Biroq elektr energiyasi narxlariga ta’siri bo‘yicha munozaralar davom etmoqda. Manba: zamin.uz
