Sergelida Qumariq ko‘chasi vaqtincha yopiladi
Toshkent shahri Sergeli tumanida joylashgan Qumariq ko‘chasi 2-15 oktabr kunlari vaqtincha yopiladi. Bu haqda Zamin.uz xabar berdi.
Bu chora Veolia Energy Tashkent kompaniyasi tomonidan amalga oshirilayotgan issiqlik tarmoqlarini yangilash ishlari bilan bog‘liq bo‘lib, diametri 325 millimetr va uzunligi 1000 metrga yetadigan quvurlar almashtiriladi. Shu sababli poytaxt transport va yo‘l-transport infratuzilmasini rivojlantirish bosh boshqarmasi bir nechta avtobus yo‘nalishlarida o‘zgarishlar kiritilishini ma’lum qildi.
Jumladan, 61-yo‘nalish A.S. Banokatiydan boshlab G‘.
Aliyev, Temiryo‘lchilar, Kichik halqa yo‘li va Bobur ko‘chalari orqali harakat qiladi. 106-yo‘nalish Sarako‘ldan boshlanib Kichik halqa yo‘li va Bobur ko‘chalaridan o‘tadi.
40-yo‘nalish Bobur, Kichik halqa yo‘li, Turkiston, Toshkent vokzali, Temiryo‘lchilar va A.S. Banokatiy ko‘chalari orqali RET zavodi bekatigacha yetib boradi.
66-yo‘nalish Qumariqdan boshlab Bobur, Kichik halqa yo‘li, Turkiston, Toshkent vokzali, Mehrjon, 8 Mart, Eski Sarako‘l, Yangi Zamon, Sarako‘l va A.S. Banokatiy ko‘chalari orqali RET zavodi bekatigacha harakatlanadi.
52-yo‘nalish esa faqat Lokomotiv ko‘chasi va Toshkent vokzali bekatlari oralig‘ida xizmat ko‘rsatadi. Yo‘lovchilardan safarlarini oldindan rejalashtirishlari so‘ralmoqda, chunki ta’mirlash ishlari davomida yo‘llarda qiyinchiliklar yuzaga kelishi mumkin.
Zarur hollarda avtobus yo‘nalishlarida qo‘shimcha o‘zgarishlar kiritilishi ehtimoli mavjud. Batafsil ma’lumot uchun One.uz saytiga murojaat qilishingiz mumkin.
