Joriy yil sentyabr oyida AQSH dollarining qiymati pasayishi va yangi o‘quv yilining boshlanishi Toshkent shahridagi uy-joy ijara bozoriga sezilarli ta’sir ko‘rsatdi. Bu haqda Zamin.uz xabar berdi.
Makroiqtisodiy va hududiy tadqiqotlar institutining tahliliga ko‘ra, so‘mning dollarga nisbatan mustahkamlanishi natijasida ijara narxlarining milliy valyutadagi ko‘rinishi o‘zgardi. Shu bilan birga, dollarda hisoblangan ijara narxlari o‘sishga moyil bo‘lib, bu holat bozor muvozanatining qisman o‘zgarishiga sabab bo‘ldi.
Yangi o‘quv yilining boshlanishi talabalarning poytaxtga qaytishi va uy-joyga talabning oshishiga olib keldi. Natijada, ijaraga beruvchilar narxlarni oshirishni boshladi.
Sentyabr oyida o‘rtacha ta’mirlangan xonadonlar ijara narxlari ham o‘sdi. Masalan, 1 xonali uylar narxi 318 dollardan 334 dollarga, 2 xonali uylar 394 dollardan 412 dollarga, 3 xonali uylar 477 dollardan 502 dollarga va 4 xonali uylar 537 dollardan 556 dollarga ko‘tarildi.
Narx jihatidan eng arzon tumanlar sifatida Sergeli va Uchtepa ko‘rsatildi. Sergelida 1 xonali uylar ijarasi 293 dollardan boshlansa, Uchtepada bu ko‘rsatkich 316 dollarni tashkil etdi.
Eng qimmat ijara uylar esa Shayxontohur va Yakkasaroy tumanlarida joylashgan bo‘lib, Yakkasaroyda 4 xonali uylar narxi 800 dollargacha yetdi. To‘liq ta’mirlangan kvartiralar ijarasida narxlar yanada yuqori darajada o‘sdi.
1 xonali uylar 413 dollardan 435 dollarga, 2 xonali uylar 580 dollardan 614 dollarga, 3 xonali uylar 824 dollardan 874 dollarga va 4 xonali uylar 1185 dollardan 1201 dollarga ko‘tarildi. Eng arzon uylar Sergeli va Uchtepada qolgan bo‘lsa, Mirobod va Shayxontohur tumanlarida narxlar ancha yuqori bo‘ldi.
Mirobodda 4 xonali uylar ijara narxi 1462 dollargacha yetdi. Ijara bozoridagi umumiy tendensiyalarga ko‘ra, valyuta kursining o‘zgarishi, talabning mavsumiy oshishi va uy-joy tanqisligi asosiy omillar hisoblanadi.
Shu bilan birga, ijara narxlarining oshishi talab va taklif muvozanati bilan bog‘liq bo‘lib, yangi o‘quv yilining boshlanishida talabning keskin oshishi narxlarni yuqori darajada ushlab turmoqda (manba: Makroiqtisodiy va hududiy tadqiqotlar instituti).
