DP World va Tashkent Invest Toshkentda terminal quradi

Birlashgan Arab Amirliklarining DP World kompaniyasi va O‘zbekistondagi Tashkent Invest kompaniyasi Toshkent shahrida yangi logistika terminali qurilishi bo‘yicha hamkorlik kelishuvini imzoladi. Bu haqda Zamin.uz xabar berdi.

Ushbu loyiha Dubay hukumati axborot xizmatining ma’lumotlariga ko‘ra, 288 million dollar miqdorida investitsiya jalb qilinishini ko‘zda tutadi. Terminal “Yangi Avlod” sanoat zonasida, Yangihayot tumanida joylashadi.

Loyihani amalga oshirish maqsadida qo‘shma korxona tashkil etiladi. Unda Tashkent Invest kompaniyasi 15 foiz ulushga ega bo‘lib, qolgan qismi DP World kompaniyasiga tegishli bo‘ladi.

DP World rahbari Sultan Ahmad bin Sulayemning ta’kidlashicha, bu hamkorlik O‘zbekistonni Markaziy Osiyoda logistika va savdo markazi sifatida rivojlantirishga katta hissa qo‘shadi. Yangi terminal mintaqaga jahon darajasidagi infratuzilma va zamonaviy intellektual logistika xizmatlarini taqdim etadi.

Terminalda quruq port, bojxona nazorati hududlari hamda omborxonalar qurilishi rejalashtirilgan. Loyihaning birinchi bosqichida 2026–2027 yillar oxiriga qadar 63 ming kvadrat metr maydonda temir yo‘l terminali va omborlar barpo etiladi.

Ushbu ma’lumotlar Kursiv.media saytida e’lon qilingan (manba: Kursiv.media).