Dubay amirligining merosxo‘ri, shahzoda Shayx Hamdan bin Muhammad Ol Maktum an’anaviy lochin ovini o‘tkazish maqsadida O‘zbekistonga tashrif buyurdi. Bu haqda Zamin.uz xabar berdi.
Uning shaxsiy Boeing 747 samolyoti 11 oktyabr kuni Toshkent xalqaro aeroportiga qo‘ndi. Shahzoda Hamdan o‘zining ijtimoiy tarmoqlardagi sahifasida Navoiy viloyatidagi ov jarayonidan olingan fotosuratlarni joylashtirdi.
U har yili aynan shu hududda lochinlar yordamida ov qilish an’anasi bilan mashhur. Ma’lumotlarga ko‘ra, Navoiy shahridan taxminan 50 kilometr uzoqlikda Birlashgan Arab Amirliklariga tegishli tuvaloq yetishtirish markazi mavjud.
Ushbu markaz 2008 yil aprel oyida Dubay amiri va BAA vitse-prezidenti Shayx Muhammad bin Rashid Ol Maktumning tashabbusi bilan tashkil etilgan. Shahzoda Hamdan 1982 yilda tug‘ilgan bo‘lib, u Dubay amirining o‘g‘li va amirlikning rasmiy vorisi hisoblanadi.
U sport, sayohat va tabiatga bo‘lgan qiziqishi bilan keng jamoatchilik e’tiborini tortmoqda. Manba: zamin.uz
