Mehnat bozorida amaliy ko‘nikmalar ustunlik qilmoqda
O‘zbekiston mehnat bozorida so‘nggi yillarda nazariy bilimdan ko‘ra amaliy ko‘nikmalarga talab ortib bormoqda. Bu haqda Zamin.uz xabar berdi.
hh.uz ish qidirish platformasi tomonidan o‘tkazilgan so‘rovda 100 dan ortiq mahalliy kompaniya va tashkilotlar ishtirok etdi. So‘rov natijalariga ko‘ra, ish beruvchilarning 47 foizi amaliy tajribani diplomdan muhimroq deb hisoblaydi.
Ular uchun nomzodning ish tajribasi, amalga oshirgan loyihalari va sohada egallagan ko‘nikmalari asosiy mezon hisoblanadi. Shu bilan birga, ishtirokchilarning 55 foizi ishga qabul qilish qarorini lavozim turiga qarab qabul qilishini ta’kidlagan.
Masalan, axborot texnologiyalari va injenerlik sohalarida amaliy tajriba ustun bo‘lsa, ta’lim va huquq sohasida hali ham diplom asosiy talab sifatida qolmoqda. Bitiruv hujjatisiz, ammo malaka oshirish kurslarini muvaffaqiyatli tamomlagan mutaxassislarga nisbatan ish beruvchilarning munosabati ham o‘zgarib bormoqda.
So‘rovda qatnashganlarning 34 foizi bunday mutaxassislarni ishga qabul qilishga tayyor ekanligini bildirgan, 31 foizi esa ularni boshlang‘ich lavozimlarga munosib deb hisoblaydi. Ish beruvchilar nomzodlarning ko‘nikmalarini asosan suhbat, amaliy mashg‘ulotlar va sinov vazifalari orqali baholaydi.
Umuman olganda, mehnat bozori amaliy tajribaga ega mutaxassislarga bo‘lgan talabning oshayotganini ko‘rsatmoqda. Shuningdek, hh.uz hisobotiga ko‘ra, 2025 yilning uchinchi choragida o‘rtacha ish haqi 4,36 million so‘mni tashkil etib, o‘tgan yilga nisbatan 20 foizga kamaygan (manba: hh.uz).
