O‘zbekistonga kelgan sayyohlar soni rekord darajada oshdi
O‘zbekistonning turizm sohasi so‘nggi yillarda jadal sur’atlarda rivojlanmoqda. Bu haqda Zamin.uz xabar berdi.
Turizm qo‘mitasining ma’lumotlariga ko‘ra, 2025-yilning o‘tgan to‘qqiz oyida mamlakatga 8,6 milliondan ortiq xorijiy sayyoh tashrif buyurgan. Bu ko‘rsatkich o‘tgan yilning mos davriga nisbatan 112,5 foizga oshib, milliy turizm tarixida yangi rekord o‘rnatildi.
Ayniqsa, 2025-yil aprel oyidan boshlab har oyda bir milliondan ortiq turist O‘zbekistonga kelmoqda. Bu esa mamlakatning xalqaro turistik xaritadagi mavqeini yanada mustahkamlashini anglatadi.
Turizm qo‘mitasi ma’lumotlariga ko‘ra, xorijiy sayyohlar oqimi barcha asosiy bozorlar bo‘yicha sezilarli darajada oshgan. Masalan, 2025-yilda Britaniyadan kelgan turistlar soni 2,6 barobar, Qatardan 6,2 barobar, AQSHdan 3 barobar, Fransiyadan 2,9 barobar, Rossiyadan 2,1 barobar, Vengriyadan 3,3 barobar, Germaniyadan 2,5 barobar va Polshadan 6,2 barobar ko‘paygan.
Shu bilan birga, turistik xizmatlar eksporti rekord darajada o‘sib, 3,6 milliard AQSH dollaridan ortiq daromad keltirdi. Bu ko‘rsatkich turizm sohasining mamlakat iqtisodiyotidagi strategik ahamiyatini yanada oshirganini tasdiqlaydi.
Ekspertlarning fikricha, bunday ijobiy natijalarga O‘zbekistonning xalqaro maydondagi faol pozitsiyasi, yetakchi jahon media platformalari bilan hamkorlik, xorijiy davlatlarda o‘tkazilgan road-show tadbirlari, xalqaro ko‘rgazmalardagi ishtirok va xorijiy nashrlarda chop etilgan maqolalar ta’sir ko‘rsatgan. Bundan tashqari, mamlakatdagi infratuzilma, transport va mehmonxona xizmatlari sifatining yaxshilanishi ham sayyohlar sonining o‘sishiga katta hissa qo‘shmoqda.
Yangi yo‘nalishlar, madaniy festivallar va mahalliy tadbirlar O‘zbekistonni yanada jozibador turistik maskanga aylantirmoqda. Natijada, 2025-yilda O‘zbekiston Markaziy Osiyoda turizm sohasida yetakchi mamlakatlardan biri sifatida o‘z o‘rnini mustahkamladi va xalqaro maydonda o‘z brendini yanada kuchaytirdi (manba: Turizm qo‘mitasi).
